Sangha note sem tur hnâwl a ni

Mamit district-a khaw pasarih - Saikhawthlir, Chuhvêl, Kananthar, Sihthiang, Rêngdil, Zamuang leh Kawrthah khuaa Fisheries department hnuaia sem tur sangha notê 2,00,000 chu a têt lutuk avangin June 20, Inrinni khan hnâwl a ni.

Sorkar thuchhuah tarlan danin, sangha notê sem tura ruahmante chu Mamit DC Dr Lalrozama leh Fisheries department hotute'n Saikhawthlirah an endik a ni. Mamita Fisheries officer C Lallianpuii chuan, sangha notê chu a len zawng milimetre 60-80 tur a ni tih sawiin, sem tura an ruahman chu a tê lutuk a, harsatna a awm theih dawn avang­in hnâwl a nih thu a sawi.

Sangha notê supplier atana thlan chu Mizoram Fish Farmers, Animal Husbandry and Dairy Producers & Marketing Association (MIFMA) an ni. MIFMA hruaitute chuan, phai aṭanga sangha notê an lak dawnah a hmunah an enfiah phawt ṭhin a, tunah erawh chuan inkhàrkhip lai a nih avangin phaia mahni ngei kala an duh ang thlan theih a nih loh thu an sawi niin sorkar thuchhuah chuan a tarlang.