Kum thum chhungin phal chin aia tam khû tichhuak lirthei 810 hmu chhuak

Mizoramah kum thum chhungin lirthei 51,318 lirthei khû endik (vehicular emission test) aṭangin Mizoram sorkarin Rs 37,16,080 a hmu a, danin a phal chin aia tam khû (emission) tichhuak lirthei 810 hmuh a ni.

Mizoram Pollution Control Board (MPCB) aṭanga Vanglaini thu dawn danin, lirthei khû endikna hi Mizoramah hmun pali - New Capital Complex, Bawngkawn, Zemabawk leh Lungleiah a awm.

Lirthei khû endikna aṭangin Mizoram sorkarin kum 2019-20 chhungin Rs 23,45,010, kum 2020-21 chhungin Rs 12,34,870 leh kum 2021-22 chhungin Rs 1,36,200 a hmu a; kum thum chhung hian lirthei 51,318 endik aṭangin Rs 37,16,080 a hmu a ni.

MPCB hotute chuan, sorkarin inngaihdamna tel lo (zero tolerance) a puan laiin lirthei khû endiktir an tam a, hun dangah chuan an tam loh thu sawiin, "Zero tolerance week velah chuan ni khatah lirthei 200 chuangte kan endik a, chutiang hun ni loah chuan rawn endiktir an awm meuh lo. Ni khata 10 vel endik chángte pawh kan nei ṭhin," an ti a; Covid-19 léng vanga inkhuahkhirhna hrang hrang avangin lirthei khû endik a tam loh thu an sawi.

Lirthei khu endiknaah hian two wheeler-ah Rs 50, three wheeler-ah Rs 70, LMV-ah Rs 100, MMV-ah Rs 120 leh HMV-ah Rs 150 lak a ni.

Endiknaah danin a phal chin pêlte chu ni sarih dam tur rejection slip pek an ni a, chumi chhung chuan man theih an ni lo. Nisarih chhunga an siamṭha lo a nih chuan man theih an ni thung. Lirthei khu endikna hmun pali-ah hian kum 2019-20 aṭanga 2021-22 chhung khan danin a phal chin aia nasaa khû tichhuak lirthei 810 hmuh chhuah a ni.