MLA fund dik taka hman a nih chuan hna tam tak a thawh theih - Lalduhoma

Serchhip bialtu MLA Lalduhoma chuan, MLA fund chu dik taka hman a nih chuan hna tam tak a thawh theih tih sawiin, “MLA fund hi mipui ta a ni,” a ti.

Mizoram Upa Pawl (MUP), Serchhip Vengchung unit hnena MLA fund a pek hmanga MUP Rûn sak thar, April 20, Nilainia a hawnnaah thu sawiin Lalduhoma chuan, “Serchhip district-ah sum tam tak sénga hnathawh, hman zui tak loh eng emaw zat a awm a, ṭul loa pawisa tam tham tak luan ralna uiawm tak a ni. Slaughter house, cold storage leh nursing school-te hman zui tlak lohin a awm,” a ti a; Chhiahtlanga polytechnic sak pawh a puitling hlei thei lo tih a sawi.

Lalduhoma chuan, MLA fund chu mipui ta a nih thu sawiin, “Dik taka hman chuan hna tam tak a thawh theih. Covid-19 léng avangin ṭum dang angin MLA fund an indaih lo a, dilna lut zawng zawng a daih vek thei lo. A daih chin chinah MLA fund hman a ni. Kan bial chhunga MLA fund hmanna hrang hrang ka hmuhin, hna ṭha tak taka thawh a ni hi a lawmawm hle. Kan biala MLA fund hmanga hnathawhte chu a chhe tur a ni lo,” a ti.

Serchhip Bialtu MLA chuan, MLA fund hmangin Serchhip College-ah Career Coaching Centre hawn a nih tur thu sawiin, “Serchhip Kawlritlanga Mizo Cultural Heritage Centre sakna turin NEC aṭangin cheng nuai 486 dawn a ni a, ṭha taka hna thawh a ni dawn. Hemi chungchangah sorkar lam pawhin min lawmpui kan rin laiin ‘Mimal project-a sum pek’ tia hêkna ka tâwk, pawi ka ti hle,” a ti a; Cultural Heritage Centre chhawr ber tur chu Serchhip mipui an nih dawn thu a sawi.

Serchhip Vengchung MUP-te’n MUP Rûn an sak hi Health department ram chhunga sak a ni a, in sakna atan bialtu MLA Lalduhoma’n MLA fund aṭangin Rs 4,00,000 a pe a, sakna atana sum hman zat chu Rs 4,61,987 a ni.