Mizoram END-in kum 2021-22 chhungin Zu litre 51,301.407 leh ûm 16,415 man

Mizoramah zu khap a ni chungin Excise and Narcotics department (END) chuan sorkar kum liam ta, April 2021 - March 2022 chhung khan rakzu litre 51,301.407 leh sapzu ûm 16,415 an man a; ruihhlo leh a kaihhnawih thil chi hrang hrang an man aṭangin sorkarah chhiah (revenue) Rs 1,79,92,165 an chhûng lût.

END-in an tarlan danin, kum 2021-22 chhungin rakzu litre 51,301.407 an man bakah, zu bilh lai ṭín 1,30,415 an man a, zu siamna dàwidim kg. 646.68 an man bawk. Sap zu an mante chu - India siam ml. 750 úm 13,406, ml. 375 úm 1,128, ml. 180 úm 80 leh, ram dang siam úm 1,801 a ni.

END hian kum 2021-22 chhung khan heroin kg. 18.466 leh methamphetamine kg. 35.935 an man a; ruihhlo dang - ganja kg. 366.548, nitrazepam mûm 238, alprazolam mûm 3,350, clonozepam mûm 80, tramadol mûm 2,120 leh khuh damdawi 1,784 an man.

Zu man kaihhnawihah hian MLP Act, 2019 hnuaiah mi 2,425 manin, thubuai 3,015 an ziak lut a, Mizoram Excise Act 1973 hnuaiah mi 193 manin, thubuai 192 an ziak lut. Ruihhlo dang man kaihhnawihah NDPS Act, 1985 hnuaiah mi 517 manin, thubuai 371 an ziak lut a, ram dang mi 17 an man bawk.

Ruihhlo chi hrang hrang an man kaihhnawihah lirthei 113 an man a, chu’ngte chu - two wheeler 27, three wheeler 15, LMV 65, MMV pakhat leh HMV panga a ni. END hian kum 2021-22 chhung khan Mizoram sorkar sum báwmah chhiah (revenue) Rs 1,79,92,165 an chhung lut a, hmuh an inbeisei (target) cheng nuai 100 chu Rs 79,92,165-in an khûm. Revenue an hmuhnate chu - sap zu (foreign liquor & spirit) aṭangin Rs 1,42,56,855, fines & confiscation aṭangin Rs 29,00,810 leh thil dang aṭangin Rs 8,34,500 a ni.