Sorkar hnathawk hlawh tur budget-ah nikum aiin nasa taka tlem dah a ni - MLA Lalrindika Ralte

Congress Legislature Party (CLP) member Lalrindika Ralte chuan nimin khan Aizawl Press Club-ah thuthar thehdarhtute kâwmin, sorkar kum kal mek 2022-23 budget-ah sorkar hnathawk hlawh tur kum 2021-22 aia nasa taka tlem dah a nih thu a sawi.

Lalrindika Ralte chuan, kum 2022-23 budget-ah MNF sorkarin sorkar hnathawkte hlawh tur nasa taka a tihtlem thu leh sorkar chu inrêlbàwlna senso (revenue expenditure) atana sum hmang tlem tur anga a inlantir thu a sawi a, "Sorkar hnathawkte hlawh tur kher hi chu kum tin tlem tala pung tura ngaih a nih laia a tlem zawk tlat hi mak tak a ni," a ti.

Lalrindika Ralte sawi danin, sorkar hnathawkte kum tin hlawh pung (increment) leh central pay scale mila thla ruk dana dearness allowance pungte vang ringawt pawhin kum tin sorkar hnathawk hlawh atana senso pung ngei tur a ni a; chutih laiin, kumin 2022-23 budget estimate (BE)-ah department 29-a hlawh atana sum dah chu kum hmasa BE 2021-22 aiin cheng nuai 17,689-in a tlem zawk.

Department 29-ah tho hian kum 2019-20 BE-ah sorkar hnathawk hlawh atana sum dah chu a hma kum, 2018-19 BE aiin cheng nuai 50,047-in a tam zawk thung.

Sorkar sum hmanna tur ruahmanna, budget rêng rêng chu chhût chhinna a nih avangin ennawn leh a nih dante hriat vek a nih thu sawiin Lalrindika chuan, "A danglamna hi supplementary demand-ah siam rem a, Assembly House-a pass ṭhin a ni tih kan hre vek àwm e. Sorkar hnathawk hlawh tur kher kher hi chu sorkar hnathawk awm zat hriat sa vek a nih avangin dik zawka chhût chhin theih a ni," a ti.

Lalrindika Ralte chuan, sorkar hnathawk hlawh chu chhût dik thlap theih ni lo mah se, a hma kum aia tam ngei ngei tura ngaih a nih thu sawiin, "Hetih laia a hma kuma sum dah pawh pha loa heti em ema hlawh tur chhût tlem a ni hi 'budget ṭha' anga lantir tumna leh mipui bum tumna dik takah kan ngai," a ti a; sorkar hnathawk hlawh tur nasa taka tihtlem chhan sawifiah turin Chief Minister an phut thu a sawi a ni.