H/S Field-ah phûl lem phah a ni dawn - Sports Minister

Mizo High School chuan nimin khan Vanapa Hall-ah Annual Sports khârna inkhawm an buatsaih a, Sports & Youth Services minister Robert Romawia Royte-in a hmanpui. Minister chuan, High School Field-ah phûl lem phah a nih tur thu a sawi.

Robert Romawia Royte chuan, Mizo H/S chu sikul hlun leh ropui a nih thu sawiin, “Mizo hnam timawitu leh tihmingṭhatu a ni a, kawng tinrenga sikul hmasawnna chu sorkarin a ngai pawimawh a, theihtawp a chhuah mek,” a ti a; H/S Field-ah phûl lem phah a nih tur thu sawiin, a sira dawhsana tlânna tur elevated jogging track leh thil dangte dah a nih tur thu a sawi a ni.

Social media a lâr hnuah a chhe zawng leh hrisel lo zawnga thil sawi an tama a hriat thu sawiin Robert Romawia chuan, “Hei hian Mizo society ṭhang mekah nghawng ṭha lo a nei thei a, kan sim vat a ṭul hle. Zirlaite’n thu leh hla in hriatnate in finfiah a pawimawh,” a ti a; thu hriatna a dik loh chuan ngaihdan dik lo put theih a nih avangin lehkhabu, chanchinbu leh TV aṭangtea thu dik hriat tum turin a chah.

Sports Minister chuan, zirlaite chu tumna sang nei turin a chah a; New Education Policy 2020 hnuaiah sport leh physical activity-te chu curricular activity-ah dah a nih thu sawiin, chu chuan zirna a tinuam dawna a rin thu a sawi bawk.

Mizo H/S hi January 15, 1944-ah din a ni a, kum 1948-ah Assam Board permission hmuin, kum 1953-ah sorkarin a la. Tunah hian zirtirtu 41 (a nghet 27 leh a nghet lo 14) leh zirlai 902 an awm mek a ni.