Chama’n Sailulak community centre a hawng

Home minister Lalchamliana chuan nimin khan a bial, Hrangturzo constituency a Sailulâk khuaah community centre sak thar a hawng. Community centre hi Border Area Development Programme (BADP) sum nuai 61 hmanga sak a ni.

Lalchamliana chuan, Hrangturzo bial chhungah Rural Development, Rurban leh sorkar hmalakna dangte hmangin hmasawnna hnathawh tam tak a awm tih sawiin, “Ṭiau lui panna kawng hi MLA ka tlin tirh ata ka rilrua awm nghal a ni a, rin aia a lo thui tham deuh si avangin hmalakna lian tham zawk kan mamawh a, nawr tlang nghal mai a har rih deuh,” a ti a; community centre tihchangtlun zelna tur chu BDO hoa dap zui turin a chah.

Hrangturzo bial chhunga inkalpawhna kawngte a ṭha tlang tawh hle tih sawiin Lalchamliana chuan, “Tuna siam ngai la awm chhun, Arṭahkawn leh Chekawn inkar kawng pawh thawh ṭan mai phalna sorkarah dil mek a ni a, hun rei lo têah ṭan theih kan beisei,” a ti.

Lalchamliana chuan, NABARD sum hmanga North Mualchenga tui lâkna tur cheng nuai 880 pek a nih tawh thu te, North Vanlaiphai tui lâk hna thawhna tur pawh hmuh a nih tawh thu leh, khaw dangte pawh Jal Jeevan Missions hmalakna hmangin functional tap water neihtir vek turin hna thawh mek a nih thute a sawi bawk.