KHAWTHLIR

Thisen pe
Johnson College NSS chuan nimin khan an college campus-ah thisen pek huaihawtin, Civil Hospital, Aizawl tan thisen unit 76 an pe a, petute mipa 58 leh hmeichhia 18 an ni.

Bial inkhawmpui
Mizoram Presbyterian Kohhrana pastor bial hrang hrangte chuan zanin aṭangin bial inkhawmpui an hmang ṭan dawn a, April 24, Pathianni zanah a ṭiak ang. Bial inkhawmpuiah hian zaninah palai lawmna leh report inkhawm neih a ni ang a, naktukah nilêngin rorel a ni dawn a, nakzan aṭanga Pathianni zan thlengin Pathian biak inkhawm neih a ni ang.

MLA-in sikul tlawh
Aizawl West-III bialtu MLA VL Zaithanzama chuan nimin khan a bial chhung, Nursery Venga sikul pathum - Nursery Middle School, Model English School leh CLS Academy-te a tlawh a; an mamawh leh harsatnate a hmunah enpuiin, theihtawpa hmalakpui a tum thu a hrilh. MLA chuan, "Zirna hi hmasawnna bulpui thlentu a ni a, kan hlamchhiah thei lo. Zirna-in kan neih ang chhunte ṭha taka enkawl hi kan bat a ni," a ti.

MLA-in enfiah
Minister of state K Lalrinliana chuan nimin zing khan a bial chhunga PWD, Kolasib Division hnuaia Kolasib town road siam hna thawh mek chu tlawhin, hna thawh a nih dan leh thawh hmabakte a enfiah. K Lalrinliana hi PWD hotute’n an ṭawiawm a ni.

Assembly jubilee
Mizoram Legislative Assembly Golden Jubilee (kum 1972-2022) lawmna puala Assembly Secretariat-in Youth Parliament Competition for College Student a buatsaihah Pachhunga University College, Govt. Aizawl College leh Hrangbana College ten final an lut. Vawiin chawhma dar 10:30 hian Assembly Secretariat Annexe Conference Hall-ah an intihsiak dawn a, Doordarshan Kendra Aizawl, LPS leh Zonet-ahte live-a pek chhuah a ni ang.

Apprenticeship Mela
Labour, Employment, Skill Development & Entrepreneurship (LESDE) department chuan nimin khan Aijal Club-ah National Apprenticeship Mela an buatsaih a, Manpower Development Board vice chairman Zothantluanga, MLA-in a hmanpui. Mela hi India ram pumah nimin khan hman a ni a, Aijal Club-a buatsaihah hian nimin khan portal hmanga registration tihna hun hawnah mi 50 chuang an inziak lut a ni.

Inhrilhfiahna hun
School Education department chuan nimin khan Champhai District Education Centre-ah primary school, middle school leh high school zirtirtute tan Fit India, Physical Education leh Zonal Sports inhrilhfiahna an buatsaih a, district bawrhsap James Lalrinchhana’n
a hmanpui.

Hriselna Kûtpui
India Independence kum 75-na lawmna, Azadi ka Amrit Mahotsav puala ram chhung RD block tina Health Mela (Hriselna Kûtpui) buatsaih mekah nimin khan Chawngte leh Khawbung RD block-ah buatsaih a ni a, vawiinah khaw dangah buatsaih chhunzawm tum a ni. Khawbung PHC-a Hriselna Kutpuiah chuan mi 876 an inentir a ni.