ATC-in zirlaite thlahna hun hmang

Aizawl Theological College (ATC) chuan April 20, Thawhlehni chawhnu khan ATC Chapel-ah kum 2021-22 academic session-a Bachelor of Divinity (BD), Master of Theology (M.Th.) leh Doctor of Theology (D.Th.) zir zo tur mi 57-te thlahna hun, Valedictory Service an hmang.

Valedictory Service hi ATC principal Rev. Prof. Tlanghmingthanga’n a kaihruai a; hmanpuitu Synod moderator Rev. Dr Vanlalnghaka Ralte chuan, zirlai chhuak turte chu Pathianin a koh ang taka nung tur leh Pathian ram zau nana thawk a, an awmna hmun ṭheuhah kohhrana mi ṭangkai ni turin a fuih.

Inkhawmah hian kum 2021-22 chhunga zirlai ti ṭha lawmman chi hrang hrang sem a ni a, zirlai chhuak turte hnenah certificate hlan a ni bawk.

ATC hian hripui léng avanga hun rei tak online-a zirna an kalpui hnuah dan pangngaiin zirna an kalpui leh tawh a, May 2-21, 2022 chhungin exam an buatsaih dawn a ni.