April 20, Nilaini-ah Covid positivity rate 5.34%

April 20, Nilaini khan Mizoramah Covid-19 vei mi 103 hmuh chhuah a ni a, positivity rate 5.34% niin, Thawhlehni aiin nasa takin a tlahniam. Nimin khan hripui vei dam tawh mi 75 chhuahtir an ni a, Covid-19 vei thi an awm lo.

Mizoramah Covid-19 positive 2,26,499 hmuh a ni tawh a, chu chu kum 2011 chhiarpuia mihring awm zat aṭanga chhûtin, 20.64% a tling a, India ram state zingah mihring awm zat aṭanga teha hripui vei tamna ber state a ni.

Nilainia hripui vei hmuh thar mi 103-te chu mipa 52 leh hmeichhia 51 an ni a, RAT hmanga hmuh chhuah vek an ni. RT-PCR, TrueNAT leh FIA hmanga swab sample endikte an negative vek a, April 11, 2022 aṭangin ni 10 chhung RT-PCR hmangin Covid-19 positive hmuh a ni tawh lo.

Covid-19 vei hmuh tamna district-te chu Serchhip leh Saitual district-te an ni a, Saitual district-a Vanbawng khuaah mi 21 hmuh niin, Serchhip district-a Hmunṭha khuaah mi 10 hmuh chhuah a ni bawk a, Hmunṭha khua hi tun dinhmunah hripui vei tamna ber khua a ni.

IDSP record angin, Mizoramah Covid-19 vei 2,26,499 hmuh chhuah a ni tawh a, mipa 1,05,515 leh hmeichhia 1,20,984 an ni a, mipa aiin hmeichhia 15,469-in an tam zawk. Nimin tlai dar 5 thleng khan mi 2,25,282 (99.46%) chhuahtir an ni tawh a, mi 694 (0.31%) thi tawhin, enkawl mek mi 523 (0.23%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,499 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.