Ruihhlo tawlh lo turin chah

Myanmar rama Zo hnahthlak pawk paruk - Chin National Front, Chin National Organisation, Hualngoram People Organisation, People Defence Army, People’s Defence Force - Kalay leh Zomi Federal Union-te chuan thuchhuah inṭâwm siamin, Myanmar aṭanga sahimna zawnga Mizoram pantu zingah ruihhlo tawlh an awm a nih chuan sim nghal hmak turin an hriattir.

Mizoram mipuite'n an chungah khawngaihna leh duhsakna nasa tak an lantir laia Myanmar aṭanga sahimna zawnga lutte'n ruihhlo an tawlh lut ṭhin nia sawi a awm chu pawi an tih thu pawl parukte chuan an tarlang a, "Kan sahim nana Zo fate Jerusalem pan khawmtute zingah hetiang tih chíng kan awm a nih chuan sim nghal hmak tur leh hetiang thil a awm tawh loh nan theihtawp kan chhuah dawn," an ti a; ráltlânte chu an awmna khua leh veng ṭheuhah khawtlang tana ṭangkai taka awm vek turin an ngen.

CNF, CNO, HPO/CDF-Hualngoram, PDA, PDF-Kalay leh ZFU-te chuan, Myanmar aṭanga ráltlânte Mizoram sorkar, kohhran, tlawmngai pawl, political party leh mipuite'n lainatna, hmangaihna leh duhsakna nen an buaipuina leh ṭanpuina avanga an lawm thu sawiin, "Engtikah mah kan theihnghilh tawh ngai dawn lo a ni," an ti a; Myanmar ramah remna leh muanna a awm theih nan ṭawngṭaipui zel turin Mizoram mipui an sáwm bawk.