Dy CM-in Sialhâwk tui lâkna a hawng

Deputy chief minister Tawnluia, PHE minister ni bawk chuan April 20, Nilaini khan Raifan lui aṭanga nizung chakna hmanga Sialhâwk khua châwmtu tur tui lâkna, Sialhawk Water Supply Scheme a hawng. Tui lakna hi NABARD (RIDF-XXIV) sum cheng nuai 1261.78 hmanga siam a ni.

Sialhawk community hall-a hawnna inkhawmah Tawnluia chuan, Sialhawk mipui a lawmpui thu sawiin, tui lâkna enkawl, tuaihnûm leh vil zui zel kawngah a chhawrtu mipui dah tel zel an nih thu a sawi a; in tina tui connection pek tum a nih thu sawiin, “Nizung chakna emaw, gravity leh ṭul dangte hmangin bial chhung khuate tui hnianghnâr taka pek kim vek a ni,” a ti.

SEDP Executive Board vice chairman ni bawk Tawnluia chuan, SEDP kalpui ṭan mekah hmalak ṭan tum a nih thu sawiin, “A thawh khat nan Mizoram pumah chhungkua 60,000 tuam hmasak phawt tum a ni a, MLA bial tinah chhungkua 1,500 zelin chhungkaw khat zelah Rs 50,000 ṭheuh peka bul ṭan tum a ni,” a ti a; SEDP dawng hmasa tur thlangtu committee chu khua, district leh state level anga din vek tur a nih thu a sawi.

Sialhawk Water Supply Scheme-ah hian August 19, 2019-ah hna thawh ṭan niin, May 31, 2022-a zawh hman tura tih ni mah se, September 1, 2021 khan tui pump theiha siam zawh a ni a; in 520 tan tui connection pek tum a ni.

Tui pump chhuah nan hian pumping station pali siam niin, a vaiin solar power plant kilowatt 243.1 bun a ni a, power siam chhuak turin solar plate 748 dah a ni. Hawnna inkhawmah hian MLA C Lalmuanpuia leh sorkar official-te an tel.