Nuai 42 eiru-ah Siaha DC hlui puh DC hluiin state sorkar a khing lêt

Siaha deputy commissioner hlui Bhupesh Chaudhary, IAS chu sorkar sum nuai 42 eiru-ah puh a ni. Bhupesh Chaudhary hian Gauhati High Court, Aizawl Bench-ah Mizoram sorkar a khing lêt a, a khin lêtna hi nimin khan ngaihtuah ṭan a ni.

Siaha DC atana Bhupesh Chaudhary thlaktu Siaha DC thar chuan Siaha DC pisaah eirûkna a awm ngei nia hriain Chief Vigilance Officer (CVO) hnenah a thlen a; CVO chuan Siaha DC thu thlente chu a zir chian hnuah chhui zui turin Anti Corruption Bureau (ACB) a hriattir.

ACB chuan Bhupesh Chaudhdary puhna chu an chhui chian hnuah, cheng nuai 42 a tichingpen ngei niin an hmu chhuak a; sum a tih chingpenna chu National Highway zauhna leh Truelab Quattro lei chungchangah a ni.

An thil hmuh chhuahte chu ACB chuan CVO-ah an thehlut a, CVO chuan a zir chian leh hnuah Lokayukta hnenah an ngaihtuah turin a thawn. Lokayukta chuan hemi chungchangah hian hearing a nei ṭan mek.

Hetih lai hian, Bhupesh Chaudhary chuan puh a nih chungchangah hian Gauhati High Court, Aizawl Bench-ah writ petition a thehlut a, writ petition hi nimin khan ngaihtuah ṭan a ni.

2014 batch AGMUT cadre IAS officer Bhupesh Chaudhary hian February 2019 khan Siaha DC hna a chelh ṭan a, August 2020 khan hmun dangah sawn a ni a, tunah hian Delhi-ah Municipal Corporation of Delhi (MCD) Central-ah deputy commissioner a ni mek nia thu dawn a ni.