Youth Parliament Competition-ah Govt. Aizawl College an thiam ber

Mizoram Legislative Assembly kum 50-na, golden jubilee lawmna puala Youth Parliament Competition buatsaih chu nimin khan zawh a ni a, Govt. Aizawl College pakhatna an ni.

Assembly Golden Jubilee Youth Parliament Competition khârna inkhawm, Assembly Annexe conference hall-a neih hmanpuitu Assembly speaker Lalrinliana Sailo chuan, "Mizoram Legislative Assembly-in kum 50 tlinga méllung pawimawh tak a thleng hi Pathian hruaina leh Zoram mipui thlawpna ṭha tak vang a ni. Ram chhung inrêlbàwlna leh mipui nghawng dan pawimawh tak tak siamna hmun a nih avangin a hlu," a ti a; ram rorelna kalphung chu ṭhalaite'n an hriat a pawimawh thu a sawi.

Lalrinliana Sailo chuan, boruak chhia leh House-a thil mawi lo awm lo tluka an kal thei ṭhin chu lawmawm a tih thu sawiin, "A bik takin Mizoram State Legislative Assembly proceeding hi India ramah a ṭha ber leh kalphung zahawm ber tiin min sawi ṭhin a, inthlanpui kan kalpui dan pawh a felfai ber min ti hial ṭhin," a ti.

Parliamentary Affairs minister TJ Lalnuntluanga pawhin thu sawiin, "MLA hmasate'n zahawm taka Assembly an lo vawn ṭhinna kha a zár kan zo zel. Ram tana ṭha turah chuan rorel lai leh eptu lamte pawhin rilru zau leh inhawng taka kan inràwn tawn fo a pawimawh," a ti.

Youth Parliament Competition-ah hian Mizorama college panga an tel a, pakhatna Govt. Aizawl College-in Rs 1,00,000 an dawng. Pahnihna chu Pachhunga University College niin Rs 70,000 an dawng a, pathumna Hrangbana College-in Rs 50,000 an dawng.

Best Parliamentarian atan Beirapatha Khaila, Hrangbana College thlan a ni a, lawmmanah Rs 10,000 hlan a ni.