KHAWTHLIR

Ministry of Home Affairs chuan tunhnai khan sorkar laipuia joint secretary emaw a tlukpui post chelh thei turin IAS kum 2011 batch angin mi pariat a thlang a, heng zingah hian R Lalvena a tel. R Lalvena hian Tamil Nadu sorkarah Social, Defence & Rehabilitation commissioner hna a chelh mek. Vanglaini palai zawhna chhangin R Lalvena chuan a zawm dawn leh dawn lohah thutlukna a la siam loh thu a sawi.

Ngaizel Taxi Welfare chuan nimin khan State Referral Hospital Blood Bank-ah blood donation camp an huaihawt a, thisen unit 28 an pe a, a petute mipa 27 leh hmeichhia pakhat an ni.

MJA, Serchhip district hruaitu tharte chuan Serchhipa IPRO K 

Sai­tluanga chu nimin khan a pisaah an kâwm. K Saitluanga chuan, MJA hruaitu tharte chu duhsakna hlanin, thuthar thehdarh mai bakah, an district mipui hmasawnna leh nun kawng dik kawhhmuha kaihruaitu ni zel turin a chah. Sorkar hmalakna hmunte tlawh dan tur an sawiho nghal bawk.

February 4, Thawhlehni zan dar 9:30 vela Thenzawl Venghluna taxi leh bike insûa hliam, bike khalhtu H Remruatpuia (20) s/o Roliana Hnamte, Thenzawl Venghlun chu a hliam tuar loin February 5, Nilaini zing dar 6:30 khan State Referral Hospital-ah a thi. H Remruatpuia hi an chetsualnaah na taka hliamin, nikhaw hre loin a awm nghal a, Thenzawl damdawi-ina lak a nih hnuah, State Referral Hospital-ah lak leh nghal a ni.

Agricultural Technology Management Agency (ATMA), Siaha district-in Siahaa Exhibition-cum-Farmers Award 2020 an buatsaih chu nimin khan khâr a nia, district agriculture officer Zoramthanga'n exhibition-a ti ṭhate hnenah lawmman - certificate leh Rs. 10,000 ṭheuh a sem. Exibition chhung hian Animal Health Camp buatsaih a ni bawk.