MRB-a hnam dang 19 dah ngheh tum dodal
Mizoram Rural Bank Officer Association (MRBOA) leh Mizoram Rural Bank Staff Association (MRBSA) chuan thuchhuah siamin, tun hnaia social media-a MRB-a thawkte an nuar anga thu thehdarh chu a dik loh thu an tarlang. MRB chairman Vadde Jaya Chandra-a'n hnam dang mi 19 dah nghet tura hma a lâkna sût turin an phût bawk.
MRBOA leh MRBSA chuan, tunah hian MRB-ah hnam dang mi 19 hna zawm mek an awm thu sawiin, "Kan recruitment rules-in a sawi danin, anni hian Mizo ṭawng pawl 8 standard thleng an thiam tur a ni, tih a ni," an ti a; hnam dang mi 19-te chuan Mizo mipui dâwr thei khawpin Mizo ṭawng an thiam loh thu an tarlang.
MRB-a pawl pahnihte chuan, hnam dang 19-te chuan Pachhunga University College aṭangin dik lo taka class VIII level language proficiency test certificate an nei a, chumi hmang chuan MRB Chairman-in a ngheta dah a tum niin an tarlang. Mi 19-te hian November 19, 2020-ah dah ngheh an dil a ni.
"Kan Recruitment Rules kalha induhsakna uchuak tak hmanga hma an la hi kan duh lo a, ti lo turin MRB-a thawktu intêlkhawm chuan kan Chairman kan ngen a, a thil tih sût nghal a, dan ang taka exam buatsaih a, an tlin loh chuan bàn (terminate) mai turin kan phût a ni. Mizote kan inhumhalhna dan palzút záwnga hmalakna hi a tàwp thlengin kan dodâl dawn," an ti.
MRBOA leh MRBSA tarlan danin, dan ang chuan hnam dang, MRB-a hna zawmte'n hna an zawm aṭanga thla 6 chhungin Mizo ṭawng an thiam a ni tih hriatna, language proficiency test (LPT) an ti tur a ni a, an tlin loh chuan thla 6 dang hun pek belh theih a ni. Thla 12 chhunga LPT-a an tlin loh chuan Board of Directors-in a remtih chuan thla ruk dang a pe leh thei bawk.