Vawk vulhtute zangnadawmna pe thuai turin Mizoram sorkar phût

ZPM party chuan thuchhuah siamin, African Swine Fever vanga chhiatna tawk vawk vulhtute hnenah zangnadawmna pe thuai turin Mizoram sorkar an phût.

Mizorama vawk pûl hri tuartute hnenah tun thlenga zangnadawmna pek chhuah a la ni lo chu mak an tih thu tarlangin ZPM chuan, "Central sorkar aṭanga pawisa pek chhuah tawh, Mizoram sorkar sum báwma pawisa awm sa reng hi sorkar hian engtikah nge pek chhuah a tum tih kan zawt a, a rang thei ang bera vawk vulhtute zangnadawmna pe chhuak turin Mizoram sorkar kan phût a ni," an ti.

ZPM chuan, sorkar laipuiin March 22, 2022 khan Mizoram sorkar hnenah vawk vulhtute zangnadawmna tur Rs. 5,84,97,000 a pe tawh tih sawiin, "AH&Vety minister Dr K Beichhua chuan vawk thi zat leh a neitute chu sorkarin fel taka a chhinchhiah thu leh rei lo têa pek chhuah theih a beisei thu a sawina pawh thla khat a liam tawh," an ti a; zangnadawmna la pek loh chhan chu Mizoram sorkarin sum a tum ve tur 50% a pek theih loh avang em ni, tiin AH&Vety Minister an zawt a ni.

ZPM tarlandanin, Mizoramah vawk pûl hri léng avangin March-December 2021 chhungin khua leh veng hrang hrang 272-ah vawk 29,824 a thi a, January-April 2022 chhungin vawk 770 a thih leh tawh bakah, fi nfi ahna nghak mek vawk 205 leh vawk suat tawh 124 a awm a ni