Mihring zat aṭanga hripui vei tawh zat 20.65%

April 21, Ningani khan Mizoramah Covid-19 vei mi 91 hmuh chhuah a ni a, positivity rate 8.97% a ni. Nimin khan hripui vei dam tawh mi 54 chhuahtir an ni a, Covid-19 vei thi an awm lo.

Mizoramah Covid-19 positive 2,26,590 hmuh a ni tawh a, chu chu kum 2011 chhiarpuia mihring awm zat aṭanga chhûtin, 20.65% a tling a, India ram state zingah mihring awm zat aṭanga teha hripui vei tamna ber state a ni.

Ningania hripui vei hmuh thar mi 91-te chu mipa 32 leh hmeichhia 59 an ni a, TrueNAT hmanga hmuh pakhat leh RAT hmanga hmuh 90 an ni.

RT-PCR leh FIA hmanga swab sample endikte an negative vek a, April 11, 2022 aṭangin ni 11 chhung a záwnin RT-PCR hmangin Covid-19 positive hmuh a ni tawh lo.

Covid-19 vei hmuh tamna district-te chu Aizawl, Serchhip leh Saitual district-te a ni a, Saitual district-a Vanbawng khuaah mi 21 hmuh niin, April 20 khan mi 21 hmuh an lo ni tawh bawk.

IDSP record angin, Mizoramah Covid-19 vei 2,26,590 hmuh chhuah a ni tawh a, mipa 1,05,547 leh hmeichhia 1,21,043 an ni a, mipa aiin hmeichhia 15,496-in an tam zawk. Nimin tlai dar 5 thleng khan mi 2,25,336 (99.45%) chhuahtir an ni tawh a, mi 694 (0.31%) thi tawhin, enkawl mek mi 560 (0.24%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,590 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.