Bairabi kudama kuhva phur chhuak ; Thuneitute'n hma an lak mumal loh vangin YMA-in an thiam dan anga hmalak an tum

Bairabi North-a bamboo industry kudam pakhata kuhva rah dahte chu April 23, 2022, Inrinni zan khan phurh chhuah ṭhen a ni a, Assam lamah kalpui a ni. Zampuimanga Group YMA chuan kuhva rah chungchangah hian thuneitute aṭangin hmalakna mumal a awm loh avangin an thiam dan anga hmalak an tum mek.

Vanglaini thu dawn danin, kudama kuhva rahte chu April 23 zanlaiah truck ke 12 nei hmangin ip 15-20 vel phurh chhuah a ni. Hemi chungchang hi Zampuimanga Group YMA hruaitute chuan an hriat veleh bawhzuiin, kudamah an kal nghal a, an nanchin hman loh avangin an ûm zui a, mahse, truck chuan police checkgate a paltlang hman a ni.

Zampuimanga Group YMA chuan thuchhuah siamin, kuhva phur truck chu Zophai Police checkgate-a duty-te'n an lo man din ngei an beisei laiin, an man lo mai ni loin, motor number leh driver hming pawh chhinchhiah loin an kaltlangtir tih an tarlang a, "Hetianga tih a ni ta mai hi a hrilhhaithlak kan ti hle a ni," an ti.

Kudama kuhva rahte chu khawih chêt theih tawh lo turin Kolasib SP-in thupek a chhuah tih tarlangin Group YMA chuan, "A hnuaia police lamin awlsam taka an lo chhuah leh si hi hriatthiam harsa kan ti hle," an ti a; a mawphurhtu department/ sorkar lamin hma a la lo a nih chuan, hotu sang zawkah thlen ngei a ṭul dawna an hriat thu an tarlang.

Zampuimanga Group YMA chuan, kudama kuhva rahte chu a rang thei ang berin sorkarin chingfel se an duh thu sawiin, "Sorkarin an chingfel lo a nih chuan kan thiam dan dana hma lain kan chingfel ang," an ti.

Thuthar thehdarhtute zawhna chhangin Kolasib SP Vanlalfaka Ralte chuan, Bairabi Police Station-a FIR lut chu Customs thuneituteah an thlen a, Burma kuhva rah a nihna finfiahna pe turin an phût tih a sawi a, "Customs lam hian a finfiahna a awm loh chuan an chhui theih loh thu an hriattir vangin tunah hian Burma kuhva a nihna finfiah turin hma kan la mek," a ti a; kuhva rah chu khawih che tawh lo turin a neitute an hriattir thu a sawi.

Hetih lai hian, kuhva rah neitute chuan way bill pekna tax invoice pahnih an neih hnuah, Mizoram kuhva rah a nih ngei thu hriatpuina lehkha dang an nei leh tawh. Tarlan tawh angin, Zampuimanga Group YMA chuan, February 23, 2022 khan kudamah kuhva rah an hmu tawh a, tax invoice chu April thlaa pek chhuah anga ziah a ni thung.

Kuhva rah neitute chuan tun hnai khan Mizoram Rubber & Allied Crops Grower Association-in kuhva rahte chu Mizoram chhunga thar ngei a ni tih an hriatpuina lehkha an nei thar. Lehkha hi June 10, 2021-a siam anga tarlan a ni a, reference number erawh chu 31.4.22 (April 31, 2022) tih a ni thung. April thlaah ni 31 a awm ngai lo a, tunah April 25, 2022 a la ni chauh bawk.

Mizoram Rubber & Allied Crops Grower Association-in hriatpuina lehkha an siam anga lang chu tun hnaia siam ni ngeia an hriat thu, Zampuimanga Group YMA chuan an sawi.