Bangladesh leh Mizoram minister-te'n Insumdawn tawnna tur hmun an tlawh
Bangladesh Commerce minister Tipu Munshi chuan Mizoram a rawn tlawh mek a, April 23, Inrinni khan Mizoram Commerce & Industries minister Dr R Lalthangliana nen ram pahnih insumdawn tawnna tur Silsuri leh Kawrpuichhuah an tlawh bakah, insumdawn tawn dan tur an sawi dûn.
Minister pahnih hian Inrinni chawhma lam khan Mizorama Silsuri leh Bangladesh-a Sajek inkara insumdawn tawnna border haat siamna tur hmunhma an tlawh a; Silsuri aṭangin Bangladesh ram chhunga Udaipur thleng an kal bakah, border haat siamna tur lungphùm an phúm a ni.
Tipu Munshi chuan border haat chu ram pahnih tan a ṭangkai hle dawn tih sawiin, peih thuai a nih theih nan Bangladesh sorkarin chak taka hma a lâk dawn thu a sawi.
Dr R Lalthangliana chuan, Mizoram kaltlanga India leh Bangladesh insumdawn tawn a pawimawh thu sawiin, MNF leh India sorkar inremnaah border haat kalpui tura ziah lan a nih angin chak taka hmalak tum a nih thu a sawi a, "Mizoram aṭangin hralh chhuah tur thil chi hrang hrang, in sakna leh kawngpui siamna hmanrua lung leh ràwrá bakah, thlai chi hrang hrangte kan nei dawn a, chu chuan kan ram economy a tisang thei dawn a ni," a ti.
Border haat hmun tur tlawhnaah hian MLA pahnih - Lalrintluanga Sailo leh K Laldawngliana, Commerce and Industries secretary Esther Lalruatkimi bakah, Bangladesh leh Mizoram sorkara official dangte an tel a ni.
Minister pahnih hian Silsuri aṭangin helicopter hmangin Lunglei district-a Tlabung an pan nghal a, Tlabung bula Kawrpuichhuah Integrated Check Post (ICP) dinna tur hmunhma an tlawh.
Tipu Munshi chuan, Bangladesh sorkarin Mizoram nena insumdawn tawnna tihhlawhtlin a ngai pawimawh tak zet tih sawiin, "Kawrpuichhuah ICP leh Silsuri, Tuipuibari, Nunsuri leh Marpara-a border haat-te tihpuitlin a, an nih tur anga kalpui a nih theih nan Bangladesh sorkarin kan tih turte a rang thei ang bera ûm zui kan tum" a ti.
Mizorama lungte bakah thlai thar - balhla leh hmarchate Bangladesh-in a mamawh a, a lei duh reng tih sawiin, Munshi chuan, "Ramri inṭâwm kan nih angin, inhriatthiam tawnna boruak ṭha hnuaia hmalak tlan zel a ṭul," a ti a; insumdawn tawnna chuan inlaichìnna ṭha zawk a thlen ngei a rin thu leh Mizoram a tlawh chanchin chu prime minister Sheikh Hasina hnenah thlen thuai a tum thu a sawi.
Dr R Lalthangliana chuan, ram dang nena insumdawn tawnna tihhmasawn a pawimawh tak zet tih sawiin, "Insumdawn tawnnaa kan hmasawnna turin Bangladesh leh Myanmar ramte nena ramri kan neihna hmunahte border trade tihlawhtling turin theihtawp kan chhuah zel dawn a ni," a ti.
Kawrpuichhuah tlawhnaah hian West Tuipui bialtu MLA Nihar Kanti Chakma, Lunglei South bialtu MLA Dr K Pachhunga bakah, Lunglei DC leh SP te, Lungleia MJA member-te leh pawl dang hruaitute an tel a ni. ICP, Kawrpuichhuah awmna hmun tur hi December 2020 khan sorkar laipuia Ministry of Home Affairs hnuaia Land Ports Authority of India (LPAI) director (Project) Col. Raman Kumar Sharma leh CI minister Dr R Lalthangliana ten an enho tawh a; chu chu bawhzuiin Dr R Lalthangliana chuan March 2021 khan Bangladesh tlawhin, Tipu Munshi leh Bangladesh sorkar hotu dangte a kâwm a ni.
Bangladesh Commerce minister Tipu Munshi hi Bangladesh sorkara Ministry of Commerce joint secretary (FTA-1) Md. Abdus Samad Al Azad, Bangladesh High Commission, New Delhi-a Joint Secretary leh official dangte'n an ṭawiawm a; vawiinah chief minister Zoramthanga nen an inkâwm dawn a, chumi hnua Dr R Lalthangliana nen press conference an neih zawhah Mizoram a chhuahsan ang.