KHAWTHLIR
Thisen pe
Mizoram UPC ṭhalai pawl, General PYD hnuaia Social Wing Committee huaihawtin April 23, Inrinni khan CYMA Hall-ah Civil Hospital, Aizawl tan thisen unit 143 an pe a, petute mipa 116 leh hmeichhia 27 an ni. Lawngtlai Bial PYD (Mizoram)-in District Hospital tan thisen unit 22 an pe a, petute mipa 19 leh hmeichhia pathum an ni a; hmun danga Mizoram PYD-te pawhin thisen unit 50 an pe a ni. Siaha khawpuia SAY-te pawhin Salvation Army India Eastern Territory kum 105 tlin lawm nan District Hospital tan thisen unit 12 an pe bawk.
Bial inkhawmpui
Mizoram Presbyterian Kohhrana pastor bial hrang hrangte'n April 22, 2022 zan aṭanga bial inkhawmpui an hman ṭan chu nizan khan a ṭiak. Bial inkhawmpuiah hian Zirtawpni zan khan palai lawmna leh report inkhawm neih a ni a, Inrinni khan nilêngin rorel inkhawm neih a ni. Nimin khan chawhma, chawhnu leh zanah Pathian biak inkhawm a awm a, chawhnu inkhawmah Lalpa Zanriah Sakramen ṭheh a ni.
Heroin man
Champhai Police (Traffic Cell) team chuan April 22, 2022 zan khan Vankhawchhiari (42), Zokhawthar hnen aṭangin Champhai khaw dái, Zokhawthar - Champhai kawngah heroin gram 190 an man. Heroin hi international market-ah cheng nuai 95 man a ni.
Mizorama dan loa sumdawng do tum
Mizo Pan & Kuhva zuar Association Gen. Hqrs. leh Kolasib-a panhnah leh kuhva zuarte chu April 22, 2022 khan MIMA pisaah an ṭhukhawm a, resolution siamin, Mizo hming hawha vai sumdawngte'n dan loa kuhva leh panhnah zuara Mizorama an sumdawng chu dan hnuaia do tur leh tirêm turin theihtawp chhuah an tum thu an tarlang.
Dan loa zawrh khap
Serchhip district bawrhsap Nazuk Kumar chuan April 23, Inrinni khan Serchhip district-ah phalna nei loa gas, petrol leh diesel zawrh khapna thupek a chhuah a, dan bawhchhiate chu IPC Section 188 hmanga hrem theih an nih thu a tarlang.
Court hmun tur en
Champhai District & Session judge Liansangzuala, Khawzawl district bawrhsap CC Lalchhuangkima, Champhai chief judicial magistrate (CJM) Lalramsanga, sorkar leh khawtlang hruaitute chuan April 22, Zirtawpni khan Khawzawl District Court hmun tur an en. Hmunhma peih a nih hmaa district court kalpui lailâwkna tur sorkar in remchang hman hawh tur zawn ni se, an ti.
Polling station en
Siaha district bawrhsap Lalsangliana, MADC inthlan atana returning officer ni bawk chuan April 23, Inrinni khan Siaha district khawchhak tlangdunga Tipi Ferry, Riahsikah, Amôtlâh, Thiahra leh Tisopi khuaa polling station atana hman tur sikulte a enfiah. DC hian tlawmngai pawl, VC leh booth level officer-te chu inthlan hunah a ṭulna pianga election official-te pui turin a ngen a ni.