Ni 2 chhungin hripui vei 11 hmu Covid-19 vei zinga pali an dam leh

June 19 leh 20, 2020 khan Zoram Medical College (ZMC) Covid-19 Laboratory-ah Covid-19 hripui vei mi 11 hmuh chhuah belh a ni. Hetih lai hian, hripui vei enkawl mek zinga mi pali chu Covid-19 an vei tawh lo tih hmuh chhuah a ni a, anni nen hian Mizoramah Covid-19 vei mi 13 enkawl dam an ni tawh.

Health & Family Welfare Board vice chairman Dr ZR Thiamsanga, MLA chuan, June 20 khan Champhai District Hospital-ah thuthar thehdarhtute a kâwm a; Champhai district-a Covid-19 kai enkawl mek mi panga zinga palite'n hripui an vei tawh loh thu a puang a, Covid-19 kai enkawltute fakawm a tih thu a sawi.

Dr ZR Thiamsanga ṭawiawm­tu Dedicated Covid Health Care (DCHC) nodal officer Dr J Lalramchhuanga chuan, ICMR guidelines-in Covid-19 veite an dam ngei tih finfiahna atan darkar 24 chhungin vawi hnih test-ah an vei lo tih finfiah tura a tih ṭhin chu thlâkin, vawi khat test-a negative-te dam anga ngaih tawh tura tih a nih thu a sawi a; chuvang chuan mi palite pawh endik nawn a ngai tawh lo a, dama puan an nih thu a sawi a ni.

Dr J Lalramchhuanga chuan, mi palite swab sample chu a ṭul thuta endik nawn tura lâk leh phawt a nih tur thu a sawi a, "An pali hian fimkhur thilah recovery ward-ah ni sarih dah leh phawt an ni ang," a ti.

Covid-19 laka fihlimte hi Delhi aṭanga haw, June 1-a Champhaia thleng an ni a; June 3-ah swab sample lak niin, June 8-ah Covid-19 an vei tih finfiah a ni a, DCHC-ah enkawl nghal an ni. An swab sample chu June 19 khan endik leh a ni a, Covid-19 an vei tawh lo tih finfiah a ni.

Heti hian Mizoramah Covid-19 vei, enkawl dam tawh mi 13 an awm ta a; dam hmasa ber Rev. VL Hruaia chuan May 9-ah damdawi-in (SRH) a chhuahsan a, mi pariatte'n June 19-ah SRH an chhuahsan leh a; mi pali dangte erawh chu damdawi-in aṭangin an la chhuak lo.

June 19, 2020 khan ZMC laboratory-ah State Referral Hospital (SRH), Aizawl, Lunglei, Champhai, Serchhip, Lawng­tlai, Mamit, Saitual leh Khawzawl aṭanga swab sample dawn 954 endik a ni a; chuta ṭang chuan Covid-19 vei mi 10 hmuh chhuah niin, mi 944-te an fihlim a ni.

Hripui vei hmuh tharte chu mipa pali leh hmeichhia paruk, kum 21-46 inkar pakua leh naupang kum 8 mi pakhat an ni a; Mamit district mi pali, Champhai district mi pathum, Serchhip district mi pahnih leh Khawzawl district mi pakhat niin, Delhi aṭanga haw pathum leh Maharashtra aṭanga haw pasarih an ni. Pakhat chu SRH-a enkawl lai a ni a, mi dang pakuate'n harsatna an nei lo (symptom a lang lo) thung.

June 20, Inrinnia SRH, Aizawl, Lunglei, Mamit, Khawzawl leh Siaha aṭanga sample dawn endik mi 638 zing­ah Covid-19 vei pakhat hmuh chhuah a ni a, hmeichhia kum 29 niin, tun hnaia Maharashtra aṭanga rawn haw, Aizawl district mi a ni. Khung hran mek a ni a, amahah symptom a lang lo. Nimin khan SRH bakah, Aizawl, Champhai, Lunglei leh Khawzawl aṭanga sample dawnte enfik leh a ni a, result kan hre hman lo.

June 20 khan SRH-ah rinhlelh thilah mi pahnih dah luh an ni a, nimin khan June 20-a hripui vei hmuh thar chu dah luh a nih bakah, rinhlelh thilah mi pakhat dah luh a ni bawk.

Covid-19 vei mek mi 128 zinga 40 chu SRH-ah enkawl mek an ni a, mi dang 88-te chu an district ṭheuhah enkawl an ni. ZMC-a enkawl mekte hi mipa 11 leh hmeichhia 29, kum 14-57 inkar, Aizawl district mi 30, Kolasib district mi panga, Saitual district mi pathum leh Serchhip leh Mamit district mi pakhat ve ve te an ni. An vaiin harsatna lian an nei lo a, Isolation Ward-ah enkawl mek niin, ICU-a enkawl an awm tawh lo.