World Book Day hman a ni

MZP General Headquarters buatsaihin April 23, Inrinni khan MZP conference hall-ah World Book Day hman a ni a, Human Resource Development board vice chairman L Thangmawia, MLA-in a hmanpui.

L Thangmawia chuan, hnam fing leh mifing apiangin lehkhabu an chhiar nasa tih sawiin, "Chhiar tam na nâ nã chu kan thil tihna hrang hrangah thu lak nan kan hmang tlangpui. Ṭhangtharte'n ṭan kan lâk a ngai a, lehkhabu kan chhiar tam chuan ram leh hnam tana beihna kawngah a ni emaw, ṭawng hmasawnna tur leh humhalhna kawngah nasa takin lungrualna min thlen ngei ka ring," a ti. MLA hian MZP hnenah Rs 10,000 a hlan a ni.

MZP president Lalnunmawia Pautu chuan, ṭhalaite'n social media an khawih nasat avangin lehkhabu leh lehkhabu ziaktute ngaihhlut nachang an hre tawh lo tih sawiin, "Lehkhabu chhiar pawimawhna leh ziaktute pawimawhna kan hriat tharna hun a nih beiseiin MZP chuan World Book Day hi hmang kan ni," a ti a; India rama exam hrang hrangah Mizote an tlin tam theih nan lehkhabu chhiar tam a pawimawh thu a sawi.

World Book Day hmannaah hian thupui chu 'Lehkhabu chhiar hlutna' tih a ni a, thupui hi MZP adviser Vanlalremruata Tonson-in a sawi. When Black Birds Fly tih ziaktu Hannah Lalhlanpuii biangbiakna hun hman a ni bawk.