Bangladesh Minister zanriah buatsaihsak

Mizorama chám mek Bangladesh Commerce minister Tipu Munshi chu chief minister Zoramthanga'n April 22, Zirtawpni zan khan Aijal Club-ah zanriah a buatsaihsak.

CM Zoramthanga chuan, Mizoram chu Bangladesh nena ramri inṭâwm a nih avangin inlaichìnna ṭha tak neih zui zel a duh thu leh, ram pahnih inkara sumdawnnain hma a sawn theih nan hmasawnna ruhrel ṭha zawk din zel a nih a beisei thu a sawi.

Tipu Munshi chuan, Mizoram nen inlaichìnna ṭha tak neih zel a duh thu sawiin, Bangladesh ramin hmasawnna nasa tak an hmuh thu a sawi a; insumdawn tawnna lama ram pahnih tana hlâwk tawnna tura hmalakho a duh thu a sawi bawk.

Zanriah kîlhonaah hian deputy chief minister Tawnluia, Commerce & Industries minister Dr R Lalthangliana, Assembly speaker Lalrinliana Sailo leh minister dangte an tel a ni.