Ni hnih chhunga hripui vei hmuh zingah District khawpui páwn lam mi 87.83%

Mizoramah Covid-19 vei April 22, Zirtawpni leh April 23, Inrinni khan mi 189 hmuh chhuah a ni a, chu'ng zinga mi 166 chu district khawpui páwn lama mite niin, hmuh zat aṭangin 87.83% a tling. Inrinni leh nimin khan hripui vei dam tawh mi 155 chhuahtir an ni a, hripui vei thi an awm lo.

April 22, Zirtawpniah Covid-19 vei mi 112 hmuh chhuah niin, mipa 50 leh hmeichhia 62 an ni a; RT-PCR hmanga hmuh pakhat, TrueNAT hmanga hmuh pakhat leh RAT hmanga hmuh 110 niin, positivity rate chu 13.05% a ni. Ni 11 chhung a zawnin RT-PCR hmangin positive hmuh a nih loh hnuah hmuh chhuah leh a ni.

Zirtawpnia hripui vei hmuh mi 112 zingah district khawpuia mi pakua chiah an tel a, mi 103 chu district khawpui páwn lama mite an ni a; hmuh tamna ber khua Suangpuilawnah mi 25 hmuh a ni.

April 23, Inrinniah hripui vei mi 77 hmuh chhuah niin, mipa 32 leh hmeichhia 45 an ni a; RAT hmanga hmuh chhuahte vek niin, positivity rate chu 16.14% a ni. Mi 77 zinga 63 chu district khawpui pawn lama mite an ni a, district khawpuia mi 14 an tel a; hmuh tamna ber khua Sialsukah mi 14 hmuh a ni.

Covid-19 positive zinga dam tawh mi 68 chu nimin khan chhuahtir an ni a, April 23, Inrinni khan mi 87 chhuahtir an ni bawk.

IDSP record angin, Mizoramah Covid-19 vei 2,26,779 hmuh chhuah a ni tawh a, mipa 1,05,629 leh hmeichhia 1,21,150 an ni a, mipa aiin hmeichhia 15,521-in an tam zawk. Nimin tlai dar 5 thleng khan mi 2,25,491 (99.43%) chhuahtir an ni tawh a, mi 694 (0.31%) thi tawhin, enkawl mek mi 594 (0.26%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,779 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.