Khung hran mek mi 7,458 an awm

Mizoram pumah June 20, Inrinni tlai thleng khan khung hran mek mi 7,458 an awm a, isolation facility-ah mi 12 awmin, Covid Centre Centre (CCC)-ah mi 80 leh Dedicated Covid Health Centre (DCHC)-ah mi 25 an awm mek bawk.

Sorkar thuchhuah tarlan danin, June 20 thlenga khung hran tawh zawng zawng chu mi 14,324 an ni a, chu'ng zinga mi 6,695 chu hun hmang zoin an chhuak tawh a, khung mek mi 7,458 an la awm. Khung hran mek zinga mi 67 chu dah luh thar an ni a, chhuak tawh zat mi 6,695 zinga mi 850 chu chhuahtir thar an ni. Khung hran zinga mi 171 chu isolation facility-ah sawn an ni tawh thung.

Khung hran mek zingah sorkar quarantine facility-ah awm tam berin, mi 3,592 an ni a; community quarantine facility (CQF)-ah mi 2,720, isolation facility-ah mi 126, home quarantine-ah mi 979 leh hotel/paid-ah mi 41 an awm mek a ni.

CQF-a awm mek mi 2,720 zinga a tam ber, mi 2,266 chu Aizawl district-a mite an ni a; Lunglei district-ah mi 212, Champhai district-ah mi 37, Serchhip district-ah mi 39, Lawngtlai district-ah mi 96, Mamit district-ah mi 48, Saitual district-ah 11 leh Hnahthial district-ah mi 11 an awm mek. Kolasib leh Khawzawl district-ah CQF siam a ni lo a; Siaha district-a CQF-a awmte an chhuak vek tawh bawk.

District tina isolation facility hrang hrangah mi 462 dah tawh a ni a, chu'ng zinga mi 336 chu chhuak tawhin, mi 126 an la awm. Aizawl district-a isolation facility-ah mi 282 dah an nih tawh laiin, Lawngtlai district-ah chuan dah an la awm lo.

Mizoram puma CCC-ah mi 80 an awm mek a; chu'ngte chu Lungleiah mi 44, Kolasib-ah mi paruk, Serchhipah mi panga, Lawngtlaiah mi pariat leh Mamitah mi 17-te an ni. DCHC-ah mi 25 an awm mek a; Lungleiah mi pahnih, Siahaah pariat, Champhaiah pariat, Serchhipah pathum, Mamitah pakhat leh Khawzawlah mi pathum an ni a, district dang zawngah an awm lo a ni.