Hunthar Veng lei tlahniam venna atan DPR peih tawh

Hunthar Venga lei tlakhniam ṭhinna bula lei tawlh zel tur venna atana sorkar laipuia sum dilna tur detail project report (DPR) chu peih a ni tawh. DPR hi cheng vbc. 16 tura siam a ni.

Thu dawn danin, DPR hi peih ni tawh mah se, January 12, 2017-ah ennawn leh phawt a ni dawn a, chumi hnuah sorkar laipuiah thehluh a ni ang.

February thlaa hna ṭan hman ngei turin Disaster Management & Rehabilitation depart­ment chuan sorkar laipuia thuneitute nawr an tum a ni. A tirah DPR hi cheng vbc. 15-a siam tum ni mah se, cheng vbc. 16-a siam a ni.

Hunthar Vengah hian August 14, 2016 zana ruahsûrin Lalhlupuii in kawmthlang a timin a, in tan a hlauhawm avangin khawtlangin an bungruate an thiar chhuak a, in pawh a hlauhawm tur chin an ṭhiat nghal a ni. Lei a chêt zui zel avangin a bul hnaia in pasarih pawh ṭhiah zui a ni a, chhungkaw 45 an riak chhuak. Lei chêt dan hi Mizoram sorkar leh Shillong-a Geological Survey of India mithiamte'n an endik tawh a, an report milin DPR pawh siam a ni.