Therhlo beisei lo tur leh kawng ṭha siam turin Lal Thanzara'n PWD engineer-te a chah

Minister Lal Thanzara chuan, Mizoramah sum tam tak senga kawngpui siamte kum khat pawh a daih hleithei lo chu a damdawi zawng chhuak a, kawng ṭha zawk siam tum turin PWD engineer-te a fuih a; contractor-te aṭanga therhlo/sum leh pai beisei lo turin a chah bawk.

PWD enkawlnaa Chief Minister puitu Lal Thanzara hian nimin khan PWD-in kum 2015-16 chhunga an hnathawhte thlirletna leh hun lo kal zel tura an hmalak dan turte Engineer-in-Chief pisa conference hall-a neihah thu sawiin, PWD engineer-te chu hna ṭha zawka thawk turin a ngen a, "Sum tam tak senga kan kawng siamte'n kum khat pawh a daih hlei thei lo leh sidedrain siam ṭhat loh vanga kan pavement work tlo hlei thei lo te, tun hmaa kan hmuh ngai loh motor ke 12 leh a aia tamte'n an rah chhiat theih loh khawp a ṭha kawng siam turin engineer kan nihna angin, a damdawi zawn chhuah lamah kan thluakte tun ai hian i vawrhvir nasa leh zual teh ang u," a ti.

Lal Thanzara chuan, PWD hotute chu hna thawhna hmun tlawh ṭhin tur leh surprise checking-te uar tura chahin chu chuan hna pawh a tihṭhat a beisei thu a sawi a, "EE/SDO level-ah paper work thawh tur tam tak in neih chu hriat a ni. Mahse, paper work chhuanlama site visit leh supervision in tih loh hi a tiang lo," a ti a; DPR chu dawhkana siam mai tur a nih loh thu leh revised estimate siam ngai fote chu pumpelh tuma ṭan lak a ṭul thu a sawi.

Contractor-te aṭanga therhlo leh sum leh pai beisei chu 'Ram hlui zia' a ni tih sawiin Thanzara chuan, information technology a ṭhat tawh em avangin therhlo lak chíngte chu zêp rûk theih a ni tawh lo tih a sawi a, "Kut tling loa sum lak hi ṭhenawm khawvengte nuih tet tet hlawhna leh hlimna aia lungaihna min thlentu a ni tih i hria ang u," a ti.

Minister chuan, kum 2016-a fûr chhung rei tak vanga kawngpui chhiate sawiselna ri ring tak chu tuna working season chhung hian tihreh vek tum a, an hma zawn ṭheuha an mawhphurhnaah ṭan la turin engineer-te a chah a; "PWD officer-te in chhâwng sang ṭha tak takah, car changkang ber ber nen an lên laiin, Mizoram kawng a chhe tawlh tawlh mai si, an tih hmain ram leh hnam tan in thiamnate thawh zel turin ka ngen che u," tiin, PWD ngineer-te chu neitu thinlung pu tur leh mipui tana kawng ṭha siamsak chu an bat a ni tih inhre thar turin a fuih.

Review meeting hi PWD secretary Lalramthanga'n a kaihruai a; road, building leh highway enkawltu chief engineer-te'n a lem nen an hnathawh dan an sawifiah. Engineer-in-chief R Vanlaltluanga'n report a pek danin, PWD hian kawngpui km. 7000 chuang, building 3,098 leh lei (bridge) 128 an enkawl mek a ni. Meeting hi vawiinah chhunzawm a ni ang.