KHAWTHLIR
NIB thukhawm
NLUP Implementing Board (NIB) chu nimin khan an chairman JH Roṭhuama, MLA hoin NIB conference hall-ah an ṭhukhawm a; January 14-a Kuthnathawktute Ni hman dan tur, NLUP hmalak mek, department-te sum din hmunte leh NLUP hnuaia infrastructure (link road, kudam, market shed leh lei) enkawl chungchangte an thlirho.
Republic Day
Nimin khan Champhai DC conference hall-ah Champhaia Republic Day hman dan tur ngaihtuahin offcial-te an ṭhukhawm. Department hrang hrangte chanvo leh thil dang inbuatsaih lâwk ngaite tihfel nghal a ni a, department hrang hrangte'n celebration fund an pek dan tur bi-thliah nghal a ni.
NEC member thi
North Eastern Council (NEC) member Prof. Gangmumei Kamei (77) chu nimin khan Imphal, Manipur-ah a thi a, nimin khan NEC Secretariat, Shillong-ah amah hriatrengna leh sûnna hun hman a ni. Prof. Gangmumei Kamei hi July 1, 2015 khan NEC member atan ruat a ni.
In kâng
Nilaini zan dar 10:30 vel khan Serchhip P&E Venga Zohmingthanga te in, Assam type chu a kâng a, bungrua chuh hman lohin a kâng ral. In kan chhan hriat a ni lo a, a kan laiin in neitute an awm lo.
Zirlai chawimawi
MZP Sub-Hqrs., Kawrtethawveng chuan nimin khan an huam chhunga zirlai kum 2016-a Higher Secondary School Leaving Certifcate examination-a passed-te chawimawina an hlan.
CM-in hmanpui
Chief minister Lal Thanhawla chuan nimin khan Champhai district-a Leisenzo khuaah Tuipuiral Zirlai Pawl General Conference a hmanpui a, Inrinniah Aizawl a thlen leh beisei a ni.