Rashtra Katha Shivir-ah Larsap
Shri Vedic Mission Trust chuan December 31, 2016 khan Gujarat-ah ‘19th Rashtra Katha Shivir’ an buatsaih a; sàwm a nih angin Governor lt. gen. Nirbhay Sharma-a'n a hmanpui.
Governor chuan, India chu ṭhalai tamna ram a nih avangin ram chhung ṭhalaite thil tih theihna leh thawhrimnaah ram hmasawnna thui tak a innghat tlat tih a sawi a, "Ṭhalaite hmakhua ngaih leh chhawrtlaka chherchhuah hi kan tihmâkmawh a ni. Ram chhung chanchin zau zawka hriat tum leh hnam hrang hrang awmte nena inpawhna leh inunauna siam thiam a pawimawh hle," a ti.
Mizoram chu hnam ziarángah a hausak thu sawiin Larsap chuan, "Mizoram hi nakin lawkah chuan India leh Asia chhimchhak ramte nena insumdawn tawnna turah kawngkapui ber a la ni dawn," a ti a; Mizoram chu inthliar hranna awm lo ‘classless society’ a nih thu a sawi.
Governor chuan, India hmarchhak bial chuan ram pum zau zawng 8% a luah avangin ram ṭhan len zelna turah a pawimawh tih sawiin, "Hmarchhak hi inkalpawhna ṭha leh hmasawnna kalpui chak theih tawk lohna bial a nih avangin duhthusamin a changkang thei lo," a ti.
Shri Vedic Mission Trust hi India ram hnam zia leh chanchin hlui ropui tak takte zir chiang a, khawvel changkang zelah India-in nasa taka culture, science leh technology lama a thawhhlawk dante an phochhuak ṭhin.
Kumina Rashtra Katha Shivir-ah hian India rama zirna in hrang hrang aṭangin zirlai 15,000 an tel a; zirlaite bakah armed force, paramilitary, coastguard leh National Disaster Response Force aiawh ṭhahnem tak an tel a ni.