Mizoram sorkarin MSSSB a la din lo MSSSB Chairman dilna a lut nual

Mizoram sorkara thawk tur group B (non-gazetted) chin hnuai lam latu atana Mizoram sorkarin din a tum Mizoram Subordinate Services Selection Board (MSSSB) chu din a la ni lo. Hetih lai hian, MSSSB chairman tur dilna chu eng emaw zat a lut tawh.

Department of Personnel and Adminis­trative Reforms (DPAR) hotute hnen aṭanga Vanglaini thu dawn danin, MSSSB chairman ni tura application chhuah a nih hnuah, mi eng emaw zat chuan dilna an thehlut a ni. Hetih lai hian, MSSSB chairman thlangtu tur Selection Board chu an la ṭhukhawm lo a, an ṭhutkhawm hunah dilna lutte chu zir chiangin, chairman tur an thlang ang.

Tunah hian Control­ler of Examina­tion leh hna dang ṭhenkhat, department dang aṭanga awm lailâwk (deputation) tur zawnna atan advertisment chhuah mek a ni bawk.MSSSB dinna atan hian Mizoram Subordinate Service Selection Board (Recruitment and Condition of Service) Rules, 2019 chu September 30, 2019 khan Council of Minis­ter chuan an pawm tawh. Tarlan tawh ṭhin angin, June 10, 2019-a Council of Ministers meeting chuan, MPSC-in Mizoram sorkara thawk tur lakna a khawih ṭhin zinga group B (non-gazetted) chin chu MPSC-in khawih tawh lo turin thutlukna an siam a, group-B (non-gazetted) chin hnuai lam hna thawk tur lakna buaipui turin MSSSB din an rêl a ni.