Rilru dik pu turin ZPM mite chah

ZPM Ṭhalai president Malsawmzuala chuan, "Pathian ṭih tlat chungin poli­tics-ah hian tel ila, kan ram politics hmélhmangah inthlâkthlengna i thlentir ang u," a ti a; Mizoram politics hmélhmang thlâk thei tur khawpa rilru dik pu turin a chah. 

Malsawmzuala hian November 23, Thawhṭanni zana Damveng, Aizawla ZPM party mite inhmuh khawmnaah thu sawiin, "Party politics-a kan tel ve hian thil eng pawh tih thiang, mawi leh mawi lo awm lo, kan páwl ṭhatna tur a nih phawt chuan páwl dangte chu sawisel a, thu dik vak lo pawha vawm pawp pawp mai tur, tih ang chi rilru hi ZPM mi leh sate tan put ve a rem lo," a ti. 

Thu dik hrûla inbeih te, phuahchawp leh belhchian dâwl lo hmanga páwl dang beihte chu politics bawlhhlawh, Kristiante tih atana mawi lo a nih thu sawiin Malsawmzuala chuan, chu'ng lakah chuan fihlim turin an party mite a chah a, "Kohhran leh khawtlang tan ṭhahnemngaihna rilru, rilru fím leh kâwi lo kan pu ang chiahin, politics-ah pawh kan rilru put hmang a pangngai tur a ni," a ti a; khawtlang leh kohhrana rilru ṭha tak, politics-a pawisak nei leh si lo ni lo turin a chah a ni.