Champhai leilet humhalh dan tur sawiho

Land Revenue & Settlement minister Lalruatkima leh minister of state TJ Lalnuntluanga te chuan nimin khan sorkar hotute nen Cham­phai leilet humhalh chungchanga hmalak dan tur an sawiho.

Lalruatkima chuan, sorkarin leileta siam theih ram a ngaih pawimawh thu a sawi a, "Agriculture department-in nasa takin ṭan an la a, Rural Develop­ment department pawh­in ni 100 inhlawh kal­tlangin buh leh bâl thar tihpun thei nan contour terracing-te siam a ni," a ti. 

TJ Lalnuntluanga chuan, hmasawnna kal zelah leilet siam aia hlâwk awm mah se, into­delhna atan leh thar chhuah tihpun nan a pawi­mawh thu sawiin, "Leilet hi humhalh a ṭul mai bakah, siam belh zel pawh sorkarin a ngai pawimawh," a ti a; Cham­phai huam chhunga leilet hman mek dan en chian a, ennawn tur a awm chuan siam ṭhat ṭha a tih thu a sawi. 

Meeting-a tarlan dan­in, Champhai leilet zau zawng, LRD department record-a hectare 730-a zau anga chhinchhiah a ni a, leilet chu teh ṭhat leh mek a ni. Leilet rama kudam leh in (permanent structure) sakte chu Zotlang, Zote, Tlangsam road leh Tuipui hnár lamahte a tam thu an sawi lang a ni.