Ei leh bâra harsat loh dan tur sawiho
Covid-19 Medical Operational Team chairman Dr ZR Thiamsanga, MLA hoin June 20, Inrinni khan Champhai DC pisa conference hall-ah sorkar official-te an ṭhukhawm a, Covid-19 hripui léng vanga ei leh bâr lama harsatna a thlen loh dan tur an sawiho.
Dr ZR Thiamsanga chuan, Covid-19 vangin hmasawnna ruhrel siam leh hnathawh hun eng emaw chen a khaihlak thu sawiin, "Covid-19 hnu lama kal zel dan tur ngaihven a hun. Natna do kawngah kan ṭan rual em avangin India rama invéng ṭha ber kan ni thei a, hemi kawngah hian ṭhahnemngai taka thâ thawhtute an pawimawh em em vek a ni," a ti.
India ram chu khawvela hripui kai tam lamah palina a nih tawh vangin fimkhur zual a ngai tih sawiin ZR Thiamsanga chuan, "Thawhhona ṭha tak awm mek hi chhawm nun zel a ṭul," a ti a; state sorkarin Covid-19 dona kawngah sum leh pai mamawhte a pe zel niin a sawi.
Dr ZR Thiamsanga chuan, eizawnna leh ei bar lam ngaihtuah a ngaih avangin ngaihtuahna thar nena hmalak a ṭul thu sawiin, "Zirna lam thlenga ngaihtuah a ngai. Chutih rualin, mipuite'n social distancing leh hmai tuam an ngaih pawimawh chhunzawm zel a ṭul," a ti.
Champhai DC Maria CT Zuali chuan, sorkar hmalakna leh hmasawnna hlawhtling taka kalpui tur chuan department inkarah thawhhona ṭha a awm a ngaih thu a sawi a, "Sorkar scheme-te mipui chhawr theih tura chhawp chhuah kawngah inpuih tawn a ngai," a ti a; buai tak chunga meeting ngai pawimawha kalte lawmthu a hrilh.
Meeting chuan, ei leh bàr zawn kawngah Champhai chu agriculture, horticulture leh vety lama theihna sang tak nei a nih angin, huap zau zawka hmalak ni se, an ti. Ṭhalai hna nei lo tam takte tan thiamthil zir kawngah nasa zawka ṭan lak an rel a, ngaihven zui turin a kaihhnawih department hotute hrilh an ni.