Insumdawn tawnnaa tih tur duan a ni ; 'A hma thei anga insumdawntawn kan duh' - Bangladesh Minister

Mizoram leh Bangladesh insumdawn tawnna chungchang ngaihvena Mizoram tlawhtu Bangladesh Commerce minister Tipu Munshi leh Mizoram Commerce & Industries minister Dr R Lalthangliana chuan insum­dawn tawnna atana hmalakna turah joint statement an siam a, nimin khan hming an ziah hnan. Tipu Munshi chuan, a hma thei anga insumdawn tawn an duh thu a sawi.

Minister pahnih hian nimin khan Secretariat conference hall-ah press conference an nei a; Tipui Munshi chuan, kum hnih kalta khan Dr R Lalthangliana'n Bangladesh a tlawh thu sawiin, "Kan garment factory leh plastic factory-te a tlawh a, min sàwm angin Mizoram rawn tlawh ngei ka intiam. Covid-19 avangin ka rawn kal thei lawk lo a, kum hnih hnuah ka rawn kal thei ta chauh a ni," a ti.

Bangladesh Minister chuan, Mizoram leh Bangladesh-in ramri km. 380 chuang an neih thu sawiin, "Kan Prime Minister hian state ṭhenawmte nen inkungkaihna ṭha tak neih a duh a, eng nge kan tih theih tih en turin ka rawn kal a ni. In rama rawn thawn tur thil ṭha tak tak kan nei a, kan rama awm lo rawn thawn tur in nei ve bawk," a ti a; a haw hunah Prime Minister leh official-te a kawm dawn tih a sawi.

Bangladesh Minister sawi danin, Bangladesh chu khawvela garment product thawn chhuaktu lian ber dawttu a ni a; garment industry-ah thawktu mi nuai 40 vel awmin, chu'ng zinga nuai 30 vel chu hmeichhia an ni. Plastic aṭanga thil siam an thawn chhuak tam hle bawk.

Mizoram aṭanga Bangladesh-a thawn luh tura an duh langsarte chu - aieng, sawhthing, mau, hmarcha leh lung chang ṭhate a ni. Bhutan leh Bihar aṭangin lung an la lut a, Mizoram aṭanga an lak luh theih chuan lak luh man a tlawm thei dawn a ni.

Tipu Munshi chuan, chief minister Zoramthanga'n Chittagong airport aṭanga bungraw lak luh chungchang a sawipui tih sawiin, "Kan Port Minister pawh ka be nghal. Chittagong aṭangin Sajek hi darkar nga vel kal bak a ni lo. River system pawh hi tihchangtlun kan duh. Insumdawn tawnna hian inkungkaihna ṭha zawk a thlen ngei kan beisei," a ti.

Vanglaini palai zawhna chhangin Munshi chuan, "Home Ministry aṭanga phalna hmuh veleh a hma thei anga insumdawn tawnna kalpui kan duh," a ti a; insumdawn tawnna kalpui a nih theih nan theihtawp a chhuah zel tur thu a sawi.

Minister ṭawiawmtu Bangladesh official-te chuan, India leh Bangladesh sorkarin MoU an neih angin, insumdawn tawnna item turte chu insumdawn tawnna kalpuina tur district magistrate-te'n sawi dunin, thutlukna an siam tur a ni.

Commerce & Industries minister Dr R Lalthangliana chuan, Mizoram lamah Tuipuibari, Marapara, Nulsury leh Silsury-ahte border haat sak tum a nih thu a sawi a, "Silsury lamah hian Bangladesh lam chuan kawng an lai thui tawh hle. Mizoram lamah pawh kawng a awm a, mahse, a ṭha vak lo. Lei dawh ngai a awm a, Chief Minister hoa sawiho tawh niin, bailey bridge dawh tura ruahman a ni," a ti.

Kawrpuichhuahah pawh hma an lak nasa thu sawiin R Lalthangliana chuan, "Kawng a ṭha tawh a, Tlabung aṭangin minute 15 kal pawh a ni tawh lo. Border trade centre atan hmalak mek niin, a hung hna thawh a ni. Lei dawh a ngai a, a dawhna atan cheng vbc. 600 vel a ngai a, PWD-in central-ah DPR an thehlut tawh," a ti a; lei awm hma pawhin lawng hmanga insumdawn tawn theih a nih tur thu a sawi.

MINISTER-TE JOINT STATEMENT
1) Silsury (India) leh Sajek (Bangla­desh)-ah border haat sak theih dan tur uluk taka zir chian a nih hnuah Bangladesh sorkarin diplomatic channel-in approval hmuh a nih theihna atana biak turte lo bia se.
2) Inkalpawhna tihchangtlunna atan Bangladesh sorkarin km. 17-a thui Chhota Horin - Thegamukh kawng siam dan ngaihtuah se tiin Mizoram sorkarin rawtna a siam. Rawtna siam hi Mizoram sorkar chuan a kaihhnawih ministry-ah a thawn ang.
3) Khawthlangtuipui chu India-Bangladesh protocol on inland water transit-ah tel turin Mizoram sorkarin a rawt. Rawtna hi a changtu ministry-ah thawn a ni ang.
4) Khawthlangtuipuia metre 660-a thui India leh Bangladesh inkalpawh theihna tur lei dawh a nih theih nan Mizoram sorkarin theihtawp a chhuah ang. Ministry of Commerce nena inbiakpawh hnuah Bangladesh lama a changtu ministry pawh hmalakna chin hriattir a ni ang.