Bangladesh Minister leh CM inkâwm

Bangladesh Commerce minister Tipu Munshi leh chief minister Zoramthanga chu nimin khan CM banglaah an inkâwm a, ram pahnih insumdawn tawnna chungchang an sawi dûn.

Tipu Munshi leh Zoramthanga hian ramria bazar (border haat) siam chungchang te, insumdawn tawnna puitling a awm thuai theih nana hmalak ngai tur thilte leh inkalpawh tawnna changtlung tak siam a pawimawh thute an sawi dûn a ni.

Bangladesh Minister hi Pathianni zan khan Assembly speaker Lalrinliana Sailo-in zanriah a buatsaihsak a, minister Dr R Lalthangliana, deputy speaker Lalrinawma, chief secretary Dr Renu Sharma leh Assembly official-te an tel.

Lalrinliana Sailo chuan, British-in Mizoram a awp hmaa Mizote sumdawnna kalkawng ber chu Bangladesh a nih thu sawiin, "Kum 20 kal taa Bangladesh-in hma sawnna a neih hi a ropui hle. Bangladesh Minister lo zin hi insumdawn tawnnaah Mizoram tan bung thar kaina a nih ngei ka beisei," a ti.

Zan thum riaka Mizorama rawn zin Bangladesh Minister hian nimin khan Lengpui Airport aṭangin Mizoram a chhuahsan a, airport thleng minister Dr R Lalthangliana, MLA K Laldawngliana, Commerce & Industries secretary Esther Lalruatkimi leh official dangte'n an thlah.