Lawngtlaiah World Malaria Day hman a ni

Nimin, April 25 kha World Malaria Day a ni a, Lawngtlai Chief Medical Officer pisa conference hall-ah district malaria officer Dr S Thaizi kaihhruaia hman niin, Lawngtlai chief medical officer (CMO) Dr LP Malsawma’n a hmanpui.

World Malaria Day pual hian Mizoram State Rural Livelihoods Mission (MzSRLM) hnuaia self help group-te chuan Lawngtlai district-a khaw 31-ah thosi pian theihna tihbo, sikserh laka himna tur inzirtirna, thosi lên chiah leh sikserh enfiah rûnpui an buatsaih.

Dr LP Malsawma chuan, sikserh chu ngaihthah chi a nih loh thu sawiin, “Malaria tam hun a nih chhoh dawn avangin inven fimkhur a pawimawh. Thosi lên zàr hnuaia mut hi malaria laka invenna ṭha ber a ni,” a ti a; uluk taka thosi lên hmang ṭhin turin mipui a chah.

Lawngtlai district hi Mizorama sikserh tamna ber district a ni a, kum 2020 khan mi 40,789 endik aṭangin sikserh vei (positive) mi 4,183 leh sikserh vanga thi mi pali an awm. Kum 2021 khan mi 34,080 enfiah aṭangin sikserh vei mi 2,238 hmuh chhuah a ni a, sikserh vangin mi pathum an thi. Kumin 2022-ah March thla thleng khan sikserh vei mi 150 hmuh a ni tawh bawk.