Sorkarin hna a thawk nasa - Tawnluia

MNF senior vice president Tawnluia, deputy chief minister ni bawk chuan nimin khan Mizo Hnam Runa inkhawmah thu sawiin, "Kan sorkar hi Covid hripui léng karah a ṭhu thluang mai mai lo a, hna kan thawk nasa a ni," a ti.

Tawnluia chuan, "Kum hnih chhung hri léng avangin hna thawk mumal thei lo mah ila, kan theihtawp chhuahin rah ṭha a chhuah mek a, hei hi Zoram mipuiin an hmu a, nakkum inthlan lo awm turah pawh sorkar turin MNF lo chu an awm lo tih hi mipui ngaihdan a ni," a ti a; MNF chu hnam party a nih thu leh Mizo hnama piang tawh phawt chu MNF-a awm turin a sáwm.

SEDP board 14-te chu an kal ngaiin an kal reng dawn tih sawiin Tawnluia chuan, SEDP Governing Board, Executive Board, district level board din vek a ni tawh tih a sawi a, "SEDP village board hi April thla chhunga ruat vek tur a ni a, trade hi April 26-ah thlan vek a ni dawn," a ti.

MNF Sr Vice President chuan, SEDP chu Zoram hmasawnna leh changkanna tura duan a nih thu sawiin, "Hei hi hriain SEDP hi mipuiin duhsakna min hlan chhan, sorkarna min pek chhan a ni," a ti. "Kan sorkar tirh aṭangin SEDP hi kan kengkawh char char a, Zoram ruhrel siam nan - kawng siam nan, zirtirtu rawih nante kan hmang," a ti a; SEDP dawng turin constituency tinah chhungkaw

1,500 ṭheuh thlangin, chhungkaw 1,60,000 hnenah Rs 50,000 ṭheuh bul ṭan nan an pek dawn thu a sawi.

Covid-19 léng karah hna an thawk nasa nia sawiin Tawnluia chuan, "Kan ministry hian central sum hâi chhuak turin hma kan la nasa hlawm em em a ni," a ti.