BJP hi Kristiante thlavâng hauhtu a ni - BJP, Aizawl President

BJP, Aizawl district hotute chuan nimin khan an president Lallianzela hoin Aizawl Press Club-ah thuthar thehdarhtute an kâwm. Lallianzela chuan, BJP chu India rama Kristiante thlavâng hauhtu party niin a sawi.

Lallianzela chuan, India ramah BJP-in sorkarna a chan hmain hmun hrang hrangah Kristiante tihduhdahna a thleng nasa nia sawiin, “Kum 1967-ah Orissa-ah, kum 1968-ah Madhya Pradesh-ah, kum 1978-ah Arunachal Pradesh-ah, kum 1998-ah Orissa leh kum 2006-ah Himachal Pradesh-ahte Kristiante chunga hleilenna a thleng tawh a, BJP sorkar loh lai vek a ni,” a ti.

Kum 2014-ah Tamil Nadu-ah VHP-te’n nasa taka hma lain Kristian 5,000 vel Hindu sakhuaa inleh luihtir an tum tih sawiin Lallianzela chuan, “Prime minister Pu Narendra Modi chuan VHP-te hmalakna chu a rang thei ang bera titawp turin a hriattir a, ‘He thupek hi in zawm nghal dawn lo a nih chuan PM hian sipai a ngah tawk a ni tih lo hre rawh se,’ a ti a, VHP pawh mei khupin an relh zèl zêl mai a ni,” a ti a; ram chhung leh páwn aṭangin Modi-a hnena lawmthu sawina a tam thu a sawi.

Lallianzela chuan, Mizorama political party ṭhenkhatin thu belhchian dâwl loin BJP chu Kristiante tana party ṭihbaiawm tak, Kristiante dodaltu angin an chhuah niin a sawi a, “Zoram mipui mit tihdel hi an tum lian tak a ni a, an hlawhtlinpui hle. Nimahsela, khawvel changkang chho mekah mi tam zawkte’n thil nihna an hriat tawh avangin BJP-te chu Kristiante tan an hlauhawm lohzia an hre ta zel a ni,” a ti.