AMC hi ngaihthah leh palzût a ni - Rosiamngheta

Aizawl Municipal Corporation (AMC)-a Cong­ress councillor-te chuan nimin khan Aizawl Press Club-ah thuthar thehdarhtute an kâwm a; Rosiamngheta chuan, AMC in ngaihthah leh palzût a hlawh thu a sawi.

Rosiamngheta chuan, India Danpui chuan municipal chu mahnia ro inrêl tia a tarlan thu sawiin, "AMC-ah hian Mizoram sorkar hnuaiah thuneihna pek belh a awm lo. Municipal ṭha zawk min tiamtute hian mi tichhe mek zawk. Congress sorkar hnuaiah AMRUT scheme aṭangin cheng vbc. 15 hmuh a nih laiin, MNF sorkar hnuaiah chuan MNF kaihhruai AMC hian palzût bak a hlawh lo," a ti.

Hualngohmuna Solid Waste Management Centre siamna atan sorkar laipui aṭangin cheng vbc. 16 chuang a rawn kal thu sawiin Rosiamngheta chuan, "A hmun buatsaih leh buaipuina tur pawh municipal pe phal loin state sorkarin khawih a tum a ni," a ti a, municipal tana sum hmuh ni mah se, state sorkarin a pek phal loh thu a sawi.

Rosiamngheta sawi danin, NULM street vendor chu municipal buaipui tur a ni a, MNF sorkar chuan municipal a pe phal lo. Khawpui chhunga mi harsa, kawng sira inzuar mekte'n an tawrh phah a ni.

Lirthei lilàm (vehicle auction) chungchangah pawh AMC-in mahnia thuneihna a neih ṭhin chu state sorkar thu ngaicháng tura tih mek a ni. Congress sorkar hnuaiah AMC-in garbage truck 50 a thuneihnain a tiral a, tunah cesspool (ek paihna motor) tihral a tum chu sorkar thuneihna a nih thu leh auction board kaltlang a nih tur thuin state sorkarin an thunun mek a ni.

Rosiamngheta chuan, MNF kaihhruai AMC pawhin mipui leh local council tihchakna lamah hma a la duh lo nia sawiin, “Term hmasa-a pass tawh local council-te hman tur leilâwn sei lei tura tih pawh tun thlengin lei a la ni lo,” a ti.

Building Regulation bawhchhiatna a tam thu sawiin Rosiamngheta chuan, “Municipal dan zah lohna a lian hle. Mi hausate’n court-ah khingin municipal thuneihna palzûtin municipal order an stay ṭhin hi a zahthlak hle,” a ti a; municipal spirit leh self-government tihchhiata a awm mek thu a sawi.

Rosiamngheta sawi danin, building permission NOC chu local council pek tur a ni a, site plan-a leng si an pe duh lo a nih chuan an pek duh loh chhan municipal-in a zawt tur a ni. A ṭul a nih chuan LC-te NOC tel lo pawhin AMC-in a chhui chian hnuah in sak phalna a pe thei. Miin in sak phalna a dilin, AMC aṭangin thu dawn an nei lo a nih chuan, in sa pawh ni se dan an bawhchhe tawh lo a ni.