ZPM ṭobul chu Zoram thlaphâng chhanchhuah a ni - ZPM Vice President

ZPM vice president Lalthansanga chuan, an party ṭobul chu Zoram thlaphâng chhanchhuah a nih thu sawiin, an agenda lian ber chu rorelna dik bakah, Assembly House-a Pathian duh dan tun din a nih thu a sawi.

Nimina ZPM pisaa inkhawmah Lalthansanga chuan, ZPM chu pawl parukin an policy ṭheuh pu lûta din a nih thu sawiin, “Movement hmanga 2018 election hmachhawn kan ni a, mipuiin MLA pariat min pe. Inthlang ram kan nih avangin movement hming pu mah ila, movement hlawmpui nih reng a fel lo a, political party kan ni ta a ni,” a ti.

Lalthansanga chuan, “ZPM hi Zoram mipui thlaphâng chhàn tura lo ding a ni a, party dang nen kan inang lo. ZPM-a kal khawmte hian a mal malin agenda kan nei ṭhin a, tunah chuan Zoram hnam tinte tu mah thlauhthla loin, Pathian duh dana hmasawnna huapzo a awm theih nan hma kan la. ZPM hi pastor rual telna tlak a ni a, a tel pawh an tel. Kan agenda lian ber chu rorelna dik bakah, House-a Pathian duh dan tun din a ni,” a ti a; thil ṭha an duh avangin an mi leh sate ngei pawh ner nawk khawpa an chhân fo thu a sawi.

ZPM-in Val Upa Council thutlukna angin chief minister candidate atan Lalduhoma an nei tih sawiin Lalthansanga chuan, “Party harsatna reng rengah VUC thutlukna hi thu tàwp a ni... ZPM chuan nun kawng dikah mite kan kaihruai zel tur a ni,” a ti a; mipui rin tlak ni tur leh ‘kei kei’ ni loa ‘nang nang’ tihna Zoram ruai buatsaih tura ṭan la zel turin mipui a sáwm a ni.