National Panchayat Award dawn lâwm

Maubuang khua chuan nimin khan National Panchayat Award 2021 (Deen Dayal Upadhyay Panchayat Sashaktikaran Puraskar) an dawn an lawm a, Local Administration Department (LAD) minister K Lalrinliana’n a hmanpui.

K Lalrinliana chuan, Mizorama village council thawk ṭha leh entawn tlak zingah Maubuang VC an tel tih sawiin, “Maubuang khua hi faina leh kângmei venna lamah entawn tlak an ni a, lawmman pawh an dawng tawh ṭhin. National Panchayat Award a zawna kum hnih in dawng thei hi a lawmawm tak zet,” a ti.

Azadi ka Amrit Mahotsav hnuaiah sorkar laipuiin Localisation of Sustainable Development Goals theme pakua a ruahman a, Mizoramah chuan SDGs pakua zinga pathum - child friendly village, healthy village leh clean & green village-te kalpui turin VC pathum thlan a ni.

Maubuang khua hi Clean & Green Village kalpuina tur zingah a tel a, National Panchayat Award hi sanitation (faina)-ah an tih ṭhat vangin an dawng a ni. Maubuang khua hi hmarchhak state-a khaw hrang hrang zingah páwn lama inthiar awm lohna, ODF plus-a puan hmasak ber a ni bawk.