Central-in Mizoram BJP aiin MNF sorkar a duhsak zawk - RRRa

MNF adviser Robert Romawia Royte, minister of state chuan nimin khan Siahaah thuthar thehdarhtute a kâwm a; sorkar laipuiin Mizoram BJP aiin MNF sorkar a duhsak zawk niin a sawi.

Robert Romawia Royte chuan, Mizoramah nghet takin MNF sorkar a ding nia sawiin, “Tuna a lan dan chuan Pathian leh mipui zarah kum 2023 inthlanah pawh MNF bawk a sorkar leh ang. Mara mipuiin state sorkar do tlattu MADC-a sorkar neih fuh lohzia chu kan hria a, chak taka hmasawnna a kal theih nan tun dinhmunah chuan MNF party hi Mara mipui tan a ṭha ber ang,” a ti.

6th Schedule-in hamṭhatna a ken tel tam tak MADC-in a taka a chan theih nan MNF chuan hma an la dawn tih sawiin Robert Romawia chuan, “Huapzo ruahmanna siam tum mek a ni. Central sorkar leh state sorkara malsawmna tam tak hâi chhuak a, Mara mipui tana vanneihna thlen thei tur MADC-ah roreltu neih a ṭul,” a ti a; MADC-ah MNF sorkar din a nih theih nan MNF candidate-te vote ṭheuh turin Siaha district mipui a sáwm a ni.