Observer-in mawhphurtute a kâwm

Mara Autonomous District Council (MADC)-a MDC inthlanpui neih tura observer atana ruat R Lalremsanga, Hnahthial bawrhsap chuan nimin khan Siaha Circuit House-ah sector magistrate panga leh flying squad team-te a kâwm a, an hmalakna leh hmachhawpte a sawipui.

R Lalremsanga chuan, MADC-ah inthlanna felfai, muanawm leh thianghlim a awm theih nan sector magistrate leh flying squad-te'n mawhphurhna sang tak an neih thu a sawi a, "Inthlanna kaihhnawih thil pawimawh tam tak ngaihven tur a awm a, harsatna thleng palh theite chingfel turin kan sector ṭheuh hriat chian a ṭul," a ti.

Observer hian DRDA Panchyat Resource Centre-ah expenditure team leh election agent-te a kâwm bawk a; candidate-te'n inthlan laia sum an hman theih zat chu Rs 2,00,000 aia tam lo a nih thu sawiin, expenditure chungchanga tih tur leh tih loh turte an inhrilhfiah a ni.