KHAWTHLIR

CM-in thlithlai
Chief minister Zoramthanga chuan nimin khan Aizawl hmar lama bus terminal tâwt tiziawm tura insawnna/tihlenna tur hmun Zemabawkah a en thlithlai a, PWD architect-te leh Transport department hotute'n an ṭawiawm. Hmun remchang dang thlithlai zui turin an inchah nghal a ni.

Hriselna Kûtpui
India independence kum 75-na lawmna Azadi Ka Amrit Mahotsav puala Ministry of Health and Family Welfare-in Health Mela (Hriselna Kûtpui) a buatsaih kal zelah nimin khan National Health Mission leh Health & Family Welfare department chuan Lunglei RD block tan Haulawng damdawi-in (PHC)-ah Health Mela an buatsaih a, bialtu MLA Dr Vanlalṭanpuia'n a hawng. Mela-ah hian doctor 15 leh thawktu dangte'n clinic leh stall 20 an hawng a ni.

SDGs zirho
Planning & Programme Implementation department chuan nimin khan Dawrpui Multipurpose Hall-ah Workshop on Localization of Sustainable Development Goals an buatsaih a, chief secretary Dr Renu Sharma-i'n a hmanpui.

Sikul endik
Lunglei District Committee for Implementation of Covid-19 Appropriate Behaviour chuan nimin khan zirna-in hrang hrangah Covid laka invenna atana kaihhruaina an zawm dan an endik a, sikul pathum an endikah an zâwm ṭha tlangpui tih sorkar thuchhuahin a tarlang. Sikul an endikte chu - Pukpui Middle School- I, Pukpui Primary School-I leh Zohnuai Primary School-te a ni.

NATA 2022
Council of Architecture (CoA) hnuaia Bachelor of Architecture (B.Arch) zir tum, National Aptitude Test in Architecture (NATA) 2022 hmachhawn tumte tan www.nata.in ah online-a dilna hawn mek a ni. NATA 2022-ah hian candidate-te remchan dan azirin exam vawi thum neih a ni ang. Harsatna nei chuan Higher & Technical Education (Technical Wing) office, Chaltlangah zawhfiah theih a ni.