Lungphun khuaah hripui vei 69 hmu chhuak

April 24, Pathianni khan Mizoramah Covid-19 vei mi 107 hmuh chhuah a ni a, chu'ng zinga mi 69 chu Lungphun khuaa mite an ni. Nimin khan hripui vei dam tawh mi 105 chhuahtir an ni a, hripui vangin mi pakhat a thi.

Pathiannia hripui vei hmuh chhuahte chu mipa 40 leh hmeichhia 67 an ni a; RAT hmanga hmuh vek niin, positivity rate chu 35.79% a ni. RT-PCR, TrueNAT leh FIA hmangin swab sample endik a ni lo.

April 24-a hripui vei hmuh mi 107 zingah district khawpuia mi 14 chiah an tel a, mi 93 (86.92%) chu district khawpui páwn lama mite an ni. Mamit district-a Lungphun khuaah positive mi 69 hmuh chhuah a ni a, hmuh zawng zawng 107 aṭangin 64.49% a tling.

IDSP record angin, Mizoramah Covid-19 vei 2,26,886 hmuh chhuah a ni tawh a, mipa 1,05,669 leh hmeichhia 1,21,217 an ni a, mipa aiin hmeichhia 15,548-in an tam zawk. Nimin tlai dar 5 thleng khan mi 2,25,595 (99.43%) chhuahtir an ni tawh a, mi 695 (0.31%) thi tawhin, enkawl mek mi 595 (0.26%) an awm.

Nimin tlai dar 5 dinhmun angin, Siaha district-ah hripui vei enkawl mek an awm tawh lo a; Lawngtlai, Champhai leh Kolasib district-ah active case 10 an tling tawh lo vek. Saitual, Serchhip leh Mamit district-ah 100 chuang ṭheuh an la awm thung.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,886 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.