Sorkar laipui an inpeih hman chuan April 1-ah GST kan hmang ang - Sawta

Finance minister Lalsawta chuan, Good & Service Tax (GST) hman ṭan hun atana bituk April 1, 2017-ah sorkar laipui a inpeih hman chuan Mizoram sorkar chu GST hmang thei turin a inbuatsaih thu leh an hman ṭan theih tur thu a sawi.

Vanglaini palai zawhna chhangin Finance Minister chuan, Excise Duty lak dan turah state leh sorkar laipuiin inremna an la siam theih loh thu a sawi a, "State-te chuan Excise Duty hi cheng nuai 150 chin khawn kan duh a, hei hi sorkar laipui chuan tam an ti deuh. Hemi chungchang hi mumal taka sawiho a la ni lo a, state-te chu nuai 150-ah hian kan lungrual viau a ni," a ti.

Lalsawta chuan, tun hmaa sorkar laipuiin an khawn vek ṭhin Excise Duty hi GST hnuaiah chuan state leh sorkar laipuiin an inkhawn sem dawn avangin fimkhur a ṭul tih sawiin, "State-in a khawn theih chin a hniam lutuk chuan chhiah pe turte'n state sorkar eng atan mah an ngai lo ang tih a hlauhawm a ni," a ti a; Excise Duty chungchang chu Union Finance Minister hoa sawiho leh tur a nih thu a sawi.

Finance Minister sawi danin, Excise Duty hi state-in khawn ve tawh dawn mah se, an khawn zawng zawng chu state chan tur a ni lo a, state leh central-in chan ngei ngei tur an nei a, a bak insem dan tur erawh tihfel a la ni lo. Central-in an khawn tur chin a tam lutuk chuan, state leh district hrang hrangah office an inbun a ngai dawn a, a buaithlak dawn avangin state-te chuan chhiah lut a tlem phah an hlau a ni.

Mizoramah chuan Service Tax lakna tur a tlem avangin Service Tax lamah chuan sum hmuh a tam lutuk a beiseiawm lo. Kum khata service sector aṭanga Rs. 5,00,000 aia tam la lutte'n Service Tax an pek a ngai tawh dawn. Service Tax hi Rs. 5,00,000 aṭanga nuai 150 chin la lutte aṭang chuan state-in a la dawn a, cheng nuai 150 aia tam la lutte aṭang chuan sorkar laipuiin a la thung ang.

Service Tax lak tur zat hi bithliah a la ni lo a, chhiah lak zat tura sang ber Revenue Neutral Rate (RNR) atan 17%-18% ruahman chhin a ni a, mahse, pawm a la ni lo.

Lalsawta chuan, GST chu April 1, 2017 aṭanga hman ṭan tura tih ni mah se, tun dinhmunah chuan inpeih hman a beisei awm lo tih sawiin, "Sorkar laipui hian April 1 aṭanga hman ṭan tum viau mah se, meeting-ah pawh September 2017 aṭang chuan hman ṭan theih ngei a nih tur thute an sawi. Eng pawh ni se, keimahni lamah chuan April 1 aṭanga hmang ṭan thei turin kan inpeih ang," a ti.

GST chungchangah hian Union Finance Minister hoin meeting nei tawh ṭhin mah se, a pawimawh lai tak tak Excise Duty inkhawn sem dan tur te, chhiah insem dan turte leh Service Tax zat turte an la sawi thlen loh thu sawiin Lalsawta chuan, "Kan state kaihhnawih ve chiah lo turte kan la khel nasa hle," a ti a; GST chu Union Finance Minister hoin January 16-a sawiho leh tura ruahman a nih thu a sawi.

GST hman a nih hunah chuan
• Rs. 5,00,000 chin la lutte'n Service Tax an pek a ngai dawn
• Service Tax atan 17%-19% ruahman chhin a ni
• Entry Tax, VAT leh state-in chhiah a lak dang tihtawp tur a ni
• GST hnuaia chhiah bituk ang ram pumah hman a ni ang
• Mizoramin chhiah a hmuh a pun beisei a ni
• Zu leh tuialhthei aṭanga chhiah lak a huam dawn lo