CM-in sorkar ṭawiawm turin Mizoram mipuite a sáwm

Chief minister Lal Thanhawla chuan, Mizoram hmasawnna atan mipuite'n mawhphurhna inchen an nei tih a sawi a; mipuite chu sorkar ṭawiawmtu ni turin a sáwm.

Lal Thanhawla hian Nilainia East Tuipui biala khaw pathum - South Khawbung, Zawlsei leh Khuangthingahte thu sawiin, "Mizoram hi model state-a siam tura theihtawpa ṭan kan lak chhoh mekah hian ram leilung fate'n mawhphurna inchen kan nei a, hemi kawnga sorkar ṭawiawmtu leh puitu ni turin mipuite ka sâwm a ni," a ti.

Mizo mipui tam zawk chu kut hnathawk an nih avangin an hamṭhatna tur chu sorkar ngaih pawimawh berte zinga mi a nih thu sawiin CM Hawla chuan, "Zoram thar leh Zoram nuam siam turin kut hnathawktute an pawimawh a, anni'n lei rem an rah a, khaw êng an hmuh a, an mahni khawbu záwl ṭheuha thlamuang taka eizawnna an hmuh chu sorkar duh ber a ni," a ti a; kut hnathawktute tan NLUP an ruahman tih a sawi.

Chief Minister chuan, rinawm­na, dikna leh taimakna nena thawka hma late chu mi hlawhtling leh chhuanawm an nih ṭhin thu sawiin, "Sorkar aṭanga hmaṭhatna an dawn reng reng chu hetiang rilru pua dawngsawnga hma la turin mipuite ka chah a ni. Sorkarin a tum ber chu rualkhai taka Mizoram chhim leh hmar, chhak leh thlangah kawng hrang hranga hmasawnna thlentir a ni," a ti.

Chief Minister hian Nilaini zan khan Khawbungah Tuipuiral Annual Meet vawi 44-na a hawng a, nimin khan Leisenzoah Tuipuiral Zirlai Pawl General Conference a hmanpui leh bawk.