Electric Veng YMA-in kum 50-na lawm

Aizawla Electric Veng Branch YMA chuan, nimin khan an YMA Hall-ah an branch kum 50-na, golden jubilee an lawm a, bialtu MLA Lal Thanzara, minister-in a hmanpui.

Lal Thanzara chuan, aia upa zahna leh rinawmna chhawm nungtu YMA member nih chu a hlu hle tih sawiin, "YMA thil tum pathum hi Zofate awm chhung zawnga hnam anga kan goal a ni tih hre reng ang u," a ti a; duhsak bik nei loa chhiat ni chi hrang hranga YMA kaltlanga mi dangte tuamhlâwmtu nih tum zel turin kal khawmte a sáwm.

CYMA hmalakna sawiin, Lal Thanzara chuan, "Central YMA kaltlanga ruihhlo do te, sual dona atana thawktu veng tina YMA hruaitute hi an fakawm a, ṭangkaina nei ve turin YMA member-te ka sawm a che u," a ti a; Electric Veng YMA chu chak taka hma lam pan zel turin duhsakna a hlân.

Central YMA president Lalbiakzuala pawhin thu sawiin, "YMA rawngbawlnaah tawp chin leh thlen chin a awm thei lo a, ṭanpui ngai an awm chhung chuan YMA hi a kal zel dawn. YMA hi changkansan chi a ni lo a, lehkha thiamsan chi a ni lo a, piantharsan chi a ni lo," a ti.

Electric Veng YMA hian an golden jubilee lawmnaah hian an hruaitu hlui mi 73 hnenah leh an branch aṭanga CYMA hruaitu ni tawh mi pangte hnenah chawimawina thuziak an hlan a, an hruaitu hlui thi tawh mi 17 sûnna hun an hmang bawk. Jubilee lawm nan hian tlaiah ruai an ṭheh a ni.

Electric Veng YMA hian golden jubilee hi June 15, 2016-ah an lawm ṭan a, kawng hrang hranga an lawm hnuah nimin khan a lawmna pui ber leh a kharna hun an hmang a ni.