KHAWTHLIR
JEE entrance
Higher & Technical Education department chuan thuchhuah siamin, IIT, NIT leh Mizoram state quota-a engineering zir tum, JEE entrance pe duhte tan online registration tih theih a nih thu a tarlang a; HTE Technical Wing, Chaltlang Lily Vengah office hun chhungin January 16, 2017 thleng tih theih a nih thu a puang.
Republic Day
Aizawl DC Kannan Gopinathan hoin nimin khan Aizawla Republic Day hman dan tur sawiho a ni. Parade-a school contingent tel tur zawng zawngte chu Republic Day hmain medical check-up uluk taka neihpui leh ei leh in tur pawh mumal zawka pek an rél.
Bank account
Serchhip DC Dr Lalrozama hoin nimin khan a pisaah Serchhipa bank hrang hrang aiawhte leh sorkar official-te an ṭhukhawm a, January 19-a bank account hawn rûnpui neih dan tur an sawiho.
Maubuang harhna
Maubuang khawtlang hruaitute hnen aṭanga thu dawn danin, Maubuang khuaah Krismas urlâwk zan khan ṭhalai zingah harhna a thleng a, khawtlang an hlim hle. Kum thar ruai pawh January 2 aṭang khan ṭheh ṭanin, vawiinah pawh an la ṭheh chhunzawm dawn. Maubuang harhna chhim hian khaw hrang hrang aṭangin mi an kal khawm mek a ni.
C Lalruata, EX MLA thi
MLA hlui C Lalruata (72) h/o Tlangthawmi, Ramhlun South chu nimin chawhma lam khan zunthlum leh thâwk lama harsatna vangin a thi a, vawiin chhun dar 12-ah vui a ni ang. C Lalruata hi Mizoram Legislative Assembly hmasa ber, kum 1972-ah Mizo Union ticket-in Lungpho bialah MLA atan thlan tlin a ni a; Central YMA-ah general secretary a ni tawh bakah, kum 2008-2013 chhung khan MIFCO chairman a ni. Congress party-a general secretary a ni mek bawk.